“Opozita t’u bashkohet reformave, Brukseli kërkon bashkëpunim”

Zëvendëskryeministri dhe ministri i Punëve të Jashtme Edmond Haxhinasto

Pak ditë pas takimit të tretë të Stabilizim Asociimit Shqipëri – Bashkimi Evropian, zëvendëskryeministri dhe njëherazi ministri i Punëve të Jashtme Edmond Haxhinasto shprehet se është e domosdoshme që të gjitha forcat politike, e veçanërisht Partia Socialiste, të angazhohen për reformën zgjedhore. I kënaqur nga vlerësimi pozitiv i këshillit të Stabilizim Asociimit për vendin tonë, ministri Haxhinasto mban të njëjtin qëndrim me atë të komisionerit Fyle, i cili u shpreh se tashmë procesi i zgjedhjeve të 8 majit, është një kapitull i mbyllur. “Kapitulli i Zgjedhjeve është tashmë një kapitull i mbyllur dhe kjo u deklaruar shumë qartë nga komisioneri për Zgjerimin në Bashkimin Evropian, Stefan Fyle, përcaktime të tjera që ju shikoni në deklarimet e Fyle janë bërë vetëm në kontekstin e nevojës për një reformë zgjedhore në të ardhmen. Sigurisht që gatishmëria për këtë reformë zgjedhore ka qenë gjithmonë një mundësi e hapur, një mundësi konkrete”, tha Haxhinasto. Duke folur për optimizmin  e vendit tonë dhe shanset për marrjen e statusit të vendit kandidat, kreu i diplomacisë shqiptare thekson se ajo që e ka penguar vendin tonë deri tani, ka qenë mungesa e një dialogu politik nga ana e opozitës brenda institucioneve dhe angazhimi i saj për të shqyrtuar dhe miratuar ligje që kërkojnë shumicë të cilësuar në Kuvend. “Nuk është vetëm çështja e numra, por është edhe çështja e kopurtimit në tërësi të forcave politike, pra që bojkoti të mos jetë pjesë e strategjisë së tyre politike, ashtu siç është deklaruar së fundmi nga lidershipi i Partisë Socialiste, por prioritet i tyre të jetë angazhimi konkret dhe efikas për të avancuar axhendën evropiane që ka vendi”, thotë Haxhinasto. Më tej, zëvendëskryeministri dhe ministri i Punëve të Jashtme Edmond Haxhinasto, shpreson në reflektimin e opozitës për të bashkëpunuar në reformat zgjedhore, pasi siç thotë ai deri tani ka pasur vetëm deklarata nga ana e saj. “Mbetet për t’u parë se çfarë hapash konkretë ajo do të hedhë për t’u angazhuar në zbatimin e planit kombëtar të veprimit, për të adresuar 12 rekomandimet dhe prioritetet që ka vënë Bashkimi Evropian përpara Shqipërisë”, deklaroi më tej zëvendëskryeministri Haxhinasto.