Ora News: Pergjigja shqiptare e "Controcampo"- s italiane

"Ora Sport" një nga edicionet më të ndjekura sportive në Shqipëri (dy edicione ditore direkt: 12.30 dhe 21.00) do të startojë këtë të shtunë një emision të ri me format ndryshe, në orën 20:30. "Është një projekt i rëndësishëm dhe synojmë të sjellim një format si ai që ka ‘Controcampo' në televizionin italian ‘Italia Uno', - tha për "Albania-sport.com", gazetari sportiv Nertil Agalliu, një nga dy moderatorët e "Ora Sport", një prodhim i televizionit informativ "ORA NEWS".
"Do të jenë dy panele të ndryshme me të ftuar", - shton Jagert Dyrmishi, që ka drejtuar më parë "Fokus Sport" të televizionit "Koha". "Do ta nisim me një lidhje direkt nga stadiumi kombëtar ‘Qemal Stafa' pas ndeshjes Tirana-Partizani, ku do të përcjellim emocionet e protagonistëve".
Projekti është ambicioz dhe bosi i televizionit "ORA NEWS", Ylli Ndroqi ka ndërtuar dy studio të mëdha enkas për departamentin e sportit.
"Me investimin e kryer kemi mundësi të lidhemi me të ftuar të tjerë nga stadiumet e Shqipërisë, me ndërhyrje telefonike dhe për t'i dhënë jetë edhe debatit profesional, por edhe opinionet e drejtpërdrejta të trajnerëve, lojtarëve, por dhe presidentëve të klubeve", - pohon Agalliu.
"Shpresojmë të bëjmë një emision sportiv ndryshe, pasi thuajse në të njëjtën orë janë edhe rubrikat sportive të disa televizioneve të tjera", - përfundon Dyrmishi, që bashkë me Agalliun ia dalin të sjellin dy edicione të plota lajmesh sportive me zhvillimet me të fundit në Shqipëri dhe në botë.