Osmani pas takimit me Ramën: Kosova dhe Shqipëria bashkë në çdo sfidë

PRISHTINË, 16 shkurt/ATSH/ Presidentja e Kosovës, Vjosa Osmani ka reaguar pas takimit që zhvilloi sot me Kryeministrin Edi Rama i cili zhvilloi sot një vizitë zyrtare në Prishtinë.

Osmani shprehet në një postim në rrjetet sociale se “pata kënaqësinë ta mirëpres Kryeministrin e Republikës së Shqipërisë, Edi Rama, në frymën vëllazërore e cila na bashkon”.

Kryetarja e Shtetit thekson se Kosova dhe Shqipëria janë bashkë në çdo sfidë dhe në çdo sukses, me koordinim të ngushtë politik e institucional dhe me angazhim të përbashkët.

Osmani shprehet se ky bashkëpunim është shprehje e një vullneti të përbashkët kombëtar për të ecur përpara si dy shtete në shërbim të qytetarëve tanë dhe të së ardhmes sonë të përbashkët euroatlantike.