P R O J E K T L I GJ PER SHËRBIMIN E KONTROLLIT TË BRENDSHËM, NË MINISTRINË E BRENDSHME
P R O J E K T L I GJ
PER
SHËRBIMIN E KONTROLLIT TË BRENDSHËM, NË MINISTRINË E BRENDSHME
Në mbështetje të neneve 78, dhe 83, pika 1, të Kushtetutës, me propozimin e Këshillit të Ministrave, Kuvendi i Republikës së Shqipërisë
V E N D O S I:
PJESA E PARË
DISPOZITA TË PËRGJITHSHME
Neni 1
Objekti i ligjit
Ky ligj përcakton misionin, organizimin, funksionimin, detyrat dhe përgjegjësitë e Shërbimit të Kontrollit të Brendshëm, në Ministrinë e Brendshme, në vijim SHKB.
Neni 2
Misioni
Misioni i këtij shërbimi është t’i garantojë komunitetit një shërbim policor të përgjegjshëm, demokratik dhe transparent, në përputhje me legjislacionin në fuqi dhe standardet e kërkuara.
Neni 3
Objekti i veprimtarisë
Objekt i veprimtarisë së SHKB-së janë:
a) Parandalimi, zbulimi, dokumentimi dhe hetimi paraprak i veprave penale, të kryera nga punonjësit e Policisë së Shtetit, pavarësisht nga funksioni dhe grada.
b) Inspektimi i punës të së gjitha strukturave të Policisë së Shtetit për përputhshmërinë me legjislacionin në fuqi dhe standardet e kërkuara, për garantimin e përgjegjshmërisë, efektshmërisë dhe efikasitetit të tyre.
Neni 4
Përkufizime
Në kuptim të këtij ligji me termat e mëposhtme nënkuptohen:
1. “Personel me kohë të pjesshme dhe me kontratë”, punonjësIT, me njohuri në fusha të posaçme, profesionet e të cilëve nuk janë të përfshira në tabelën e funksioneve të SHKB-së ose që zëvendësojnë persona, që mungojnë, përkohësisht, për shkaqe të ligjshme.
2. “Shtetasit”, shtetasit shqiptarë, shtetasit e huaj dhe personat pa shtetësi.
3. “Masat e përshkallëzuara”, masa disiplinore, që jepen nga më e lehta deri te më e rënda, duke patur gjithmonë parasysh pasojën e ardhur, rrethanat, lehtësuese dhe rënduese, ku është kryer shkelja, si dhe rrethanat e tjera, për personalitetin dhe rezultatet në punë
4. “Testi i integritetit”, çdo lloj teknike e veçantë hetimore, për të testuar etikën dhe integritetin e një punonjësi.
Neni 5
Etika
Punonjësit e SHKB-së zbatojnë kodin e etikës së policisë dhe rregullat e etikës në administratën publike.
Neni 6
Respektimi i të drejtave dhe lirive themelore të njeriut