PD kërkon ndalimin e ngritjes së qytetit privat të Edi Ramës tek Liqeni

Deputetët Flamur Noka dhe Luçiano Boçi, në deklarata të veçanta kanë kërkuar të kryhet transparencë edhe për shifrat e korrupsionit Rama-Lepri si dhe për denoncimet publike që kanë kryer ndaj kryebashkiakut biznesmenët Hajredin Fratari dhe Dodë Doçi

Partia Demokratike ka vijuar sot sërish me akuzat për korrupsion me lejet e ndërtimit ndaj kryetarit të Bashkisë së Tiranës, Edi Rama. Deputeti i PD-së, Flamur Noka, tha në një deklaratë për mediat se janë të shumtë biznesmenët dhe politikanët që kanë akuzuar kreun e Bashkisë për korrupsion dhe se ai duhet të japë sqarime për këto denoncime. “Si deputet i Kuvendit të Shqipërisë, i kërkoj z.Edvin Rama të zhdukur në drejtim të paditur, dil nga vrima e lepurit e përgjigju akuzave të ngritura nga firmat e ndërtimit”, tha Noka. Ai ka përmendur faktin se biznesmeni Dodë Doçi e ka akuzuar publikisht kreun e Bashkisë se i ka kërkuar 20% për një leje ndërtimi. “Ndërtuesi Dine Fratari të ka paditur publikisht për gjobën prej 1 milion dollarësh që e kalon vlerën e 20% që ti vetë z. Edvin Kristaq Rama i ke vënë këtij ndërtuesi të njohur. Përgjigju!”, u shpreh sot Noka. Nga ana tjetër ia ka përmendur dhe faktin se në media është denoncuar se “në këmbim të futjes së Tan Leprit si aksioner, ti (Rama) premtoje dhënien e lejes së ndërtimit”. Noka është ndalur dhe në akuzën që ka bërë më së fundi deputetja e PD-së, Albana Vokshi. “Deputetja Vokshi të ka akuzuar se firma “Vizion Construction” është detyruar të fusë si aksioner me 20% mikun tënd, Dritan Avllaj, i njohur si Tan Lepri. Përgjigju! Kjo firmë ndërtimi të akuzon se ky 20% vetëm për këtë rast vlen jo më pak se 100 milion euro. Përgjigju!”, u shpreh deputeti Noka.

Edhe Luçiano Boçi, në një deklarim të sotëm për mediat, i ka kërkuar Edvinit që të zbardhë shifrën e aferës së tij me Tan Leprin, për të cilën tashmë duhet të interesohet edhe Prokuroria e Tiranës. “Partia Demokratike ka kërkuar sot nga Kryetari i Bashkisë së Tiranës, Edi Rama që të zbardhë aferën korruptive me biznesmenin Dritan Avllaj, të njohur ndryshe me emrin Tan Lepri. Me modelin e fundit të aplikuar për konferenca nga PD-ja dhe PS-ja, deputeti i Partisë Demokratike, Luçiano Boçi bëri një sërë pyetjesh publike në të cilat kërkohet përgjigje nga kreu i PS-së për pasurinë e tij dhe aferat korruptive. “A është 4 mijë numri i apartamenteve që do të ndërtohen? Nqs e shumëzoni me 20%, sa i bie të dispononi ju z.Rama? Sa milion euro konvertohet 20% i aferës së qytetëzës tek liqeni?”, deklaroi deputeti Boçi. Ai u shpreh se, si deputet i mazhorancës do të kërkojë që projekti i bërë për ndërtimin e pallateve te Kodrat e Liqenit të mos bëhet. “I kërkoj Berishës të gjejë hapësira ligjore dhe të zhbëjë këtë aferë të Edvin Leprit”, tha Boçi, pak minuta më parë në një konferencë për mediat.