PD sulmon sërish kryeprokuroren: Shpalli vrasës ata që me trimëri, burrëri, heroizëm, mbrojtën institucionet
Partia Demokratike ka sulmuar sërish ashpër kryeprokuroren Ina Rama gjatë ditës së sotme, duke thënë se ka shpallur vrasës mbrojtësit e institucioneve më 21 janar. Me sulmet ndaj kryeprokurores, PD ka hedhur poshtë edhe ekspertizën e FBI-së, duke qenë se kjo e fundit faktonte vrasjen e Faik Myrtajt nga ana e kreut të Gardës së Republikës, Ndrea Prendi. Ambasadori amerikan, Aleksandër Arvizu, pohoi ditë më parë se mazhoranca dhe gjykatat duhet të pranojnë provat e FBI-së, gjë që nuk është marrë në konsideratë.
Me anë të një deklarate për shtyp, PD është shprehur se hetimi i 21 janarit është zotimi i kësaj mazhorance dhe këtë që do ta bëjë. Zëdhënësja e PD-së është shprehur se duhet të zbardhen autorët e dhunës më 21 janar.
Zëdhënësja Albana Mustafaraj tha se “në daljen e tij të djeshme, kreu i opozitës, Edi Rama, faktoi se ishte ai që qëndronte prapa pretencës televizive të Ina Ramës, ndaj mbrojtësve të institucioneve Kushtetuese”.
Deklarata
Në daljen e tij të djeshme, zoti Rama, faktoi se ishte ai që qëndronte prapa pretencës televizive të Ina Ramës, ndaj mbrojtësve të institucioneve Kushtetuese
Në fjalën e tij në kryesinë e Partisë Socialiste, Edi Rama falenderoi zonjën Ina Rama, për shpalljen e tij të pafajshëm apo amnistinë e tij si organizatori kryesor i 21 Janarit 2011, mbasi në pretencën e saj televizive mbi 90 minuta, zonja Ina Rama shpalli mbrojtësit të institucioneve kushtetuese të vendit ashtu siç i kishte shpallur zoti Rama një vit më parë, si vrasës me dashje, kurse ultimatumin e zotit Rama drejtuar Kryeministrit të vendit më 20 janar: largohu ose do kalosh mbi kufoma, e vlerësoi si një retorikë të thjeshtë.
Partia Demokratike, i thotë zotit Rama mos u gëzo para kohe se, deklaratat për pafajësinë tënde në organizimin e grushtit të shtetit më 21 janar, i kanë këmbët e shkurtra, madje, ato nuk i beson as edhe ti vetë, ndaj dhe i tronditur bërtisje, – hetomëni, hetomëni.
Partia Demokratike thekson edhe njëherë se, pretenca publike televizive prej 90 minutash e Prokurores së Përgjithshme e paprecedent në historinë e një vendi të lire, akuzat e saj për vrasje me dashje ndaj oficerëve të Gardës, që me trimëri, burrëri, heroizmin e tyre mbrojtën rendin kushtetues dhe hodhën në Lanë mandatet e ëndërruara të puçistëve, dëshmojnë thjesht urrejtjen por panikun që ka mbërthyer klanin e atyre që, tek përmbysja me dhunë e pushtetit legjitim, kishin vendosur ëndrrën e mandateve të tyre.
Partia Demokratike i deklaron edhe njëherë zotit Rama se, hetimi i pavarur i 21 janarit 2011, identifikimi i ideatorëve, organizatorëve, sponsorizuesve të 21 janarit, si dhe autorëve të dhunës tragjike dhe rrethanave të saj, janë zotimi absolut i kësaj mazhorance. Ky hetim nuk do mund të pengohet as nga pretencat tuaja të përbashkëta televizive me Prokuroren e Përgjithshme, nga etiketimet që ju u bëni punonjësve që mbrojtën rendin kushtetues të vendit si vrasës me dashje dhe që së shpejti do ti shpallni vrasës me pagesë, as nga prishja e provave dhe zhdukja e dëshmive që faktojnë gjithçka rreth skenarit të 21 Janarit 2011.