PS: Berisha në interpelancë për Gërdecin

Miratimi i kalendarit trejavor ka rikthyer sërish në Kuvend debatin për tragjedinë e Gërdecit. Opozita i ka kërkuar Topallit që të fusë në kalendarin trejavor interpelancat e opozitës. Nënkryetari i grupit parlamentar të PS-së, Erion Braçe, ka kërkuar që Kryeministri të paraqitet në interpelancë për të dhënë raportin e plotë mbi dëmet që ka shkaktuar kjo tragjedi dhe çfarë masash konkrete ka ndërmarrë qeveria. Kërkesa e bërë nga grupi i PS-së nuk është pranuar nga Kryetarja e Kuvendit, e cila ka deklaruar se është bërë njëherë kjo interpelancë. Ndërsa grupi parlamentar i LSI-së ka këmbëngulur në kërkesën e tij për ngritjen e komisionit hetimor për këtë tragjedi. Sipas tyre, Kryetarja e Kuvendit dhe mazhoranca po e zvarrisin këtë çështje. Por Topalli ka theksuar se nuk mund të ngrihet një komision hetimor, ndërkohë që po heton prokuroria, pra nuk mund të ngrihen struktura paralele.