PS nuk regjistrohet si pjesëmarrëse në zgjedhjet e pjesshme lokaleNga TemaPS nuk do të marrë pjesë në zgjedhjet e pjesshme vendore të 15 nëntorit. Ka përfunduar dje në mesnatë afati i regjistrimit të partive politike që do të marrin pjesë në zgjedhje

Nëse dëshironi të lexoni edicionin online të gazetës në PDF klikoni këtu.

PS nuk do të marrë pjesë në zgjedhjet e pjesshme vendore të 15 nëntorit. Ka përfunduar dje në mesnatë afati i regjistrimit të partive politike që do të marrin pjesë në zgjedhjet e pjesshme vendore të 15 nëntorit 2009, ndërsa PS nuk ka regjistruar komisionarët e saj. Bojkoti i zgjedhjeve të pjesshme lokale është paralajmëruar disa ditë më parë nga kryetari i PS, Edi Rama, i cili dha qëndrimin e tij personal duke theksuar se PS nuk do të marrë pjesë në këto zgjedhje, por ai theksoi se do të jetë Asambleja Kombëtare e kësaj partie që do të marrë vendimin për këtë çështje.

Kodi Zgjedhor

Kodi Zgjedhor parashikon që PS, si forca më e madhe politike në opozitë, duhet të paraqesë komisionarët e vet pranë Komisioneve Zonale të Administrimit të Zgjedhjeve, si dhe në qendrat e votimit. Në rastin kur partia më e madhe në opozitë nuk e përmbush detyrimin ligjor në paraqitjen e komisionarëve në komisionet zonale dhe qendrat e votimit, atëherë partia e dytë opozitare, në këtë rast i bie që pas PS të vijë PBDNJ, mund të paraqesë komisionarët e saj në KZAZ dhe në qendrat e votimit. Partia Bashkimi për të Drejtat e Njeriut u përcaktua si parti e dytë opozitare pas PS, në zgjedhjet e 28 qershorit. PBDNJ përfaqësohet në Kuvend me një deputet, ndërsa partitë e tjera aleate me PS, PSD, PDS, e G99, nuk kanë fituar asnjë mandat parlamentar në zgjedhjet e 28 qershorit. Sipas Kodit Elektoral, për regjistrimin e partive në zgjedhje, parashikohet që në rastin kur as partia e dytë apo me radhë pas saj nuk paraqesin komisionarë në KZAZ dhe në Qendrat e Votimit, atëherë në bazë të Kodit komisionarët do të përzgjidhen nga vetë Komisioni Qendror i Zgjedhjeve.

Zgjedhjet e pjesshme të 15 nëntorit do të zhvillohen në 5 qarqe, në ato zona ku të zgjedhurit e njësive të qeverisjes vendore fituan mandatin e deputetit në zgjedhjet parlamentare të 28 qershorit. Bëhet fjalë për njësinë nr. 10 në Tiranë, Bashkinë Klos, komunën Otllak, komunën Fierzë dhe komunën Fushë-Arrëz.

Ambasadorët vizitojnë selinë e PS

Në një situatë të tillë, kur PS vazhdon bojkotin parlamentar dhe po shpall zyrtarisht bojkotin për zgjedhjet e pjesshme, është rritur edhe shqetësimi i faktorit ndërkombëtar për situatën politike në vend. Por socialistët vazhdojnë të qëndrojnë të vendosur për të mos thyer bojkotin parlamentar deri në momentin e hapjes së kutive të votimit. Pasditen e djeshme, ambasadori i KE, Lohan, ambasadori i Suedisë dhe përfaqësuesja suedeze në vendin tonë ishin në selinë e PS, ku janë takuar me kryetarin e kësaj partie, Edi Rama. Burime pranë PS bëjnë të ditur se gjatë takimit është diskutuar për mundësinë e ndërprerjes së bojkotit parlamentar nga ana e PS. Ambasadorët kanë kërkuar nga kreu i PS pikërisht ndërprerjen e bojkotit, ndërsa Rama ka pasqyruar përpara tre diplomatëve të gjitha arsyet pse PS po vazhdon në rrugën e bojkotit, si dhe në procesin e mbledhjes së firmave për hartimin e ligjit që parashikon hapjen e kutive të votimit. Deri në procesin e hapjes së kutive të votimit, PS do të vazhdojë përpjekjet e saj politike, jashtë parlamentit.