PSD, Bejtaj: Përshëndesim deklaratën e KE-së për Dosjet

>PSD-ja e ka përshëndetur deklaratën e KE të bërë nëpërmjet Sekretarit të Përgjithshëm Terry Davis, në të cilën thuhet se ligji i dosjeve, i cili hyri në fuqi para 2 ditësh, pasi nuk përmbush shumë kritere të vendosura nga Këshilli i Evropës, tha sot në një konferencë Engjëll Bejtaj, nënkryetar i Partisë Socialdemokrate. Më tej Bejtaj tha se, sipas Devis mospërputhjet e ligjit të dosjeve me standardet e KE janë konkluzionet e analizës së këtij ligji nga ana e ekspertëve të KE-së. Gjithashtu ai shprehu se, PSD vëren se kundërshtitë e shprehura nga ana e KE për ligjin e dosjeve, janë të njëjta me ato të shprehura nga ana e PSD në seancën parlamentare ku u diskutua ky ligj. Shtrirja tepër e gjerë dhe e papërcaktuar e ligjit përsa i përket kategorisë së zyrtarëve, fakti që ligji përfshin persona që aktualisht janë në detyrë dhe mungesa e një limiti kohor janë vërejtje të cilat ne, PSD, i kemi bërë prej kohësh dhe njëkohësisht janë thelbi i deklaratës së KE, nënvizoi Bejtaj. Më tej ai tha se, Miratimi i këtij ligji nga ana e mazhorancës është një aventurë e vërtetë politike që e fut Shqipërinë në një konflikt të hapur me demokracinë në tërësi dhe në mënyrë të drejtpërdrejtë me SHBA, BE, dhe me institucione të rëndësishme ndërkombëtare që punojnë për mbrojtjen e demokracisë. Ndër të tjera ai tha se vlerësojmë se: qëllimi i vërtetë i këtij ligji nuk është dënimi i krimeve të komunizmit, por është mbulimi i krimeve të bëra në këto vite të qeverisjes së Sali Berishës dhe shpurës së tij; siç është krimi monstruoz i Gërdecit, si dhe korrupsioni gjithnjë e më shumë në rritje i kësaj mazhorance, tha Bejtaj. Nënkryetari i PSD-së, tha se, duke neglizhuar çdo thirrje për arsye dhe respektim të normave dhe parimeve themelore të demokracisë në hartimin dhe miratimin e këtij ligji, Sali Berisha së fundi  dje deklaroi shkrirjen edhe të Gjykatës Kushtetuese, nëpërmjet thirrjes që i bëri anëtarëve të këtij institucioni që të mos guxojnë të merren me ligjin e dosjeve, pasi kanë konflikt interesi. Kjo do të ishtë e patolerueshme edhe për një demokraci të modelit afrikan. Kjo vërteton edhe njëherë që deklaratat e Berishës për zgjedhje të lira dhe demokratike, sipas standardeve evropiane, janë vetëm demagogji. Ligji i dosjeve që me hyrjen e tij në fuqi ka cenuar rëndë standardin e zgjedhjeve të ardhshme, ende pa u zhvilluar ato. Kjo përbën edhe një nga kundërshtitë themelore të deklaratës së KE ku thuhet se lustracioni nuk duhet të aplikohet mbi kandidatët në zgjedhje.