Pagat: rritje në shtet, ulje të gjithë të tjerëveNga Bashkim Kopliku*“Janë rritur pagat”, buçet nga të gjitha anët gënjeshtra berishiste. Jo, nuk janë rritur pagat e shumicës së shqiptarëve, por janë rritur vetëm pagat e atyre që punojnë në shtet. Kj

Nëse dëshironi të lexoni edicionin online të gazetës në PDF klikoni këtu.

“Janë rritur pagat”, buçet nga të gjitha anët gënjeshtra berishiste. Jo, nuk janë rritur pagat e shumicës së shqiptarëve, por janë rritur vetëm pagat e atyre që punojnë në shtet. Kjo rritje pagash është bërë në kurriz të të ardhurave që marrin shumica dërrmuese e shqiptarëve të tjerë: ata që nuk punojnë në shtet (të vetëpunësuarit, bizneset e punonjësit e tyre). Shumicës së shqiptarëve, këto 4 vjet, jo vetëm që nuk u janë rritur të ardhurat reale, por u janë zvogëluar.

* * *

Qeveria ka rritur pagat e punonjësve të shtetit, sidomos këto javët e fundit, thjesht për t’u blerë votat, pa pyetur fare për dëmin që u shkakton kjo të tjerëve, shumicës së shqiptarëve. Pagat duheshin rritur për të gjithë, e së bashku me rritjen e ekonomisë.

Kryeministri ynë i babëzitur pas pushtetit personal, po synon të blejë votat e nëpunësve të shtetit, duke u rritur pagat momentalisht - themi momentalisht, sepse me siguri pas kësaj rritjeje pagash, do të vijë ulja drastike edhe e pagave të tyre.

Edhe në vitin 2005, berishizmi bleu votat e nja 200-300 mijë vetëve, me premtimin e faljes së tokës që kishin grabitur. E kemi fjalën për informalët. Ajo blerje votash që u bë në vitin 2005, është e ngjashme me këtë blerje që po bëhet tani me rritjen e pagave të të punësuarve në shtet: në të dyja rastet bëhet duke abuzuar me pasurinë tonën, me pasurinë e grabitur nga shteti ynë, nga secili prej nesh.

Rritja artificiale vetëm e pagave të punonjësve të shtetit i sjell dëm ekonomisë së të gjithë vendit. Me pagat nuk mund të luajë sipas qejfit askush, as dhe një kryeministër. Pagat janë rezultat i zhvillimit ekonomik të vendit. Nëse në to ndërhyhet brutalisht, atëherë herët e vonë do të shfaqen çrregullime në ekonominë e vendit, që i paguajnë të gjithë.

Nuk çan kokën për ekonominë e vendit z. Berisha, kur është në lojë pushteti i tij personal - tashmë kjo dihet nga shumica dërmuese e shqiptarëve. Kështu e pat bërë edhe me piramidat financiare mashtruese, në vitin 1996-‘97. Atëherë shumë nuk e kuptuan se ku po i shpinte me “mrekullinë e piramidave”, e kuptuan vetëm kur humbën çdo gjë, dhe pastaj thanë: “Si nuk na thatë”. Ja ku po jua themi: mos besoni në “të mirat nga qielli” që ju sjell ky njeri, sa herë i duhet vota juaj: tashmë nuk e keni më për herë të parë!

* * *

Rritjen e pagave apo në përgjithësi të të ardhurave të popullsisë e djathta do ta zgjidhte krejt ndryshe nga qeveria aktuale.

E djathta ka prirje për t’u lënë sa më shumë lekë në dorë individëve, shqiptarëve, për t’i komanduar ata vetë, dhe jo për t’ia lënë t’i komandojë shteti. E djathta nuk është për rritjen pamasë të buxhetit të shtetit. Ajo beson se duke u lënë më shumë pará në dorë individëve (pra duke pasur një buxhet shteti jo që rritet pa pushim, si ky yni i këtyre 4 vjetëve), ekonomia do të rritej më shpejt, dhe kështu rritja e pagave dhe e të ardhurave, si e punonjësve të shtetit, si dhe e shqiptarëve të tjerë, do të ishte e natyrshme, e përgjithshme, pa dëmtuar njeri.

Por ky qëndrim bie ndesh me nevojën jetike të kryeministrit aktual për të blerë votat në prag të zgjedhjeve.

* * *

Pyesim të punësuarit te privatët, si dhe të vetëpunësuarit, dyqanxhinjtë, biznesi i vogël etj., e nga të gjithë marrim të njëjtën përgjigje: “Nuk jemi fare më mirë se para 4 vjetësh, madje jemi më keq.”

Vini re se kur berishistët guxojnë të ulërijnë vetëm për pagat e të punësuarve në shtet dhe jo për pagat a të ardhurat e shumicës së shqiptarëve.

* Marrë nga “Gazeta Shqiptare”