Papajani: 90 për qind e bizneseve deklaruan TVSH brenda afateve

Rreth 90% e bizneseve të përfshira në skemën e TVSH-së kanë bërë deklarimin elektronik të librave të shitjeve dhe blerjeve, një formë që është aplikuar për herë të parë nga administrata tatimore. Deklarimi elektronik synon të eliminojë kontaktet e drejtpërdrejta mes biznesit dhe tatimorëve por edhe të marrë në kohë reale informacionin për shitjet dhe blerjet që bën subjekti privat,

çka pritet të çojë në ulje të evazionit fiskal. Praktika e deklarimeve online të detyrimeve do të përdoret gjatë muajve të ardhshëm edhe për biznesin e vogël. 90% e tatimpaguesve shqiptarë ka përmbushur këtë detyrim. Ne kemi arritur të marrim deklaratat e rreth 13 mijë tatimpaguesve. Sfidat e mëdha të teknologjisë së informacionit të cilat kjo administratë është e detyruar dhe e ndërgjegjshme për ti zbatuar, janë ato që kanë të bëjnë me deklarimin madhor elektronik të tatimpaguesve përfshirë edhe ato të biznesit të vogël, theksoi Papajani. Kreu i Tatimeve u ka bërë apel edhe pjesës së mbetur të bizneseve në skemën e TVSH-së, që të bëjnë deklarimin elektronik. Edhe pse afati i deklarimeve ka përfunduar dje, Administrata Tatimore i ka kërkuar Ministrisë së Financave që ndaj këtyre tatimpaguesve të mos vendosen penalitete, përderisa mënyra e deklarimit online është përdorur për herë të parë këtë muaj. Vetëm pak kohë parë është formalizuar një strukturë e re pranë tatimeve, avokati i tatimpaguesve, i cili  autorizohet të investigojë të gjitha kërkesat e tatimpaguesve, që përbejnë probleme të administrimit të tatimeve siç janë vonesat e administrative të paarsyeshme, gabimet e zyrtarëve tatimorë që nuk janë zgjidhur në mënyrën e duhur pas paraqitjes së tatimpaguesi, mosrespektimi i procedurave tatimore apo shkelje të procedurave tatimore nga zyra tatimore. Ekzistojnë një sërë procesesh administrative që do të jenë të përjashtuara nga sfera e mbikqyrejs së Avokatit të Tatimpaguesve, siç janë rastet kur tatimpaguesi është investiguar nga sektori i investigimit në Drejtorinë e Investigimit Tatimore apo nga Drejtoria e Investimit të Brendshëm. Ai nuk autorizohet të investigojë apo të ndryshojë në procesin e përcaktimit të detyrimeve tatimore apo për rastet të cilat janë në proces aplikimi. Gjithashtu Avokati i Tatimpaguesve do të refuzojë ato kërkesa që janë të pabazuara dhe synojnë mosrespektimin në zbatimin e procedurave tatimore.

Last Updated on E Marte, 06 Prill 2010 18:33