Parlamenti Evropian do të diskutojë sot rezolutën për Kosovën

Bashkimi Evropian pritet të deklarohet sot rreth njëvjetorit të shpalljes së pavarësisë së Kosovës, çështje për të cilën ende ka mospajtime brenda BE-së, ka bërë të ditur Parlamenti Evropian, i cili do të shqyrtojë rezolutën për Kosovën. Parlamenti Evropian, gjatë mbledhjes në Strasburg, do të ftojë Këshillin e Ministrave dhe Komisionin Evropian të deklarohen rreth zhvillimeve në Kosovë pas shpalljes së pavarësisë, më 17 shkurt të vitit të kaluar. Qëndrimet e Këshillit të Ministrave të Bashkimit Evropian do t'i paraqesë Mirek Topolanek, kryeministër i Çekisë, njëherësh kryesues i BE-së, si dhe presidenti i Komisionit Evropian, Jose Manuel Barroso. Diskutimet rreth projektrezolutës për Kosovën, e cila është hartuar nga deputeti holandez, Joost Langendijk, do të mbahen sot pasdite - ndërsa miratimi i saj mund të shtyhet për të enjten - nëse kërkohet më shumë kohë për diskutime.