Partizani-Elbasani, 90 minuta për sezonin

Partizani-Elbasani vlerësohet nga ekspertët si supersfida e javës së 25-të të Kategorisë së Parë, nisur edhe nga pozitat e afërta e dy skuadrave, që së bashku kanë fituar 17 tituj kampionë në Kategorinë Superiore. Elbasani (vendi i dytë, 49 pikë) ka krijuar një diferencë prej +4 pikësh ndaj Partizanit (vendi i pestë, 44 pikë), tre prej të cilave pas fitores në ndeshjen direkte të fazës së parë të fituar 3-2 nga verdheblutë, falë një triplete historike të Renato Hyshmerit, e ku të kuqtë, të cilët kaluan dy herë në avantazh me anë të Klodian Alslanit (0-1) e Andrelis Pashajt (1-2), e mbyllën takimin me dhjetë lojtarë pas ndëshkimit të kapitenit Luan Pinari në pjesën e parë. Të kuqtë e Gerti Haxhiut, të cilët nuk humbasin qysh nga humbja 0-2 në shtëpi me Lushnjën, më 21 nëntor 2009 (humbja e vetme në shtëpi), duke zhvilluar një fazë të dytë shumë efektive me 14 ndeshje pa humbje (9 fitore e 5 barazime), besojnë te forca e skuadrës, teksa klubi si rrallëherë i ka grumbulluar lojtarët (në Durrës) dy ditë para takimit. Partizani ka rezultate të mira në shtëpi, me 8 fitore, 2 barazime dhe 1 humbje, ndërkohë që kundërshtari i ditës së martë, Elbasani, ka një performancë të dobët në transfertë: 4 fitore, 3 barazime dhe 5 humbje, por që mbërrin në “big clash” në kryeqytet pas katër ndeshjes pa humbje, kur të fundit e ka pësuar kundër një tjetër skuadre kryeqytetase, në humbjen 2-1 kundër Kamzës (27 shkurt 2010), me të veçantën e takimit, pasi të tre golat u shënuan nga vëllezërit Dalipi: dy, Klevisi i Kamzës dhe një, Endri i Elbasanit. Nëse Partizani vjen në sfidën kundër Elbasanit pas fitores 2-1 në Cërrik me Turbinën, verdheblutë e Krenar Alimehmetit mbërrijnë në Tiranë pas fitores 3-0 ndaj Gramshit. Edhe Elbasani është në “karantinë” 48 orë përpara derbit, teksa drejtuesit e klubit kanë vendosur edhe një shumë prej 10 milionë lekësh të vjetra për fitoren e dytë sezonale ndaj një rivali direkt për vendin e dytë si Partizani, që nga ana tjetër do të diskutojë një javës më pas, një tjetër sfidë për vendin e dytë, atë kundër Lushnjës, ndaj së cilës e ndajnë vetëm tri pikë.

Pikwt: 49-45
Partizani ka grumbulluar 45 pikë në këto 24 javë, kundrejt 49 pikëve të Elbasanit

14 ndeshje
pa humbje ka Partizani, me 9 fitore e 5 barazime. Nuk humbet nga 21 nëntor 2009

Bogdani, për një mbush 300

Sulmuesi shqiptar luan në Itali prej dhjetw vitesh nga janari i vitit 2010

Eri ka veshur fanellat e Rexhinës, Salernitanës, Veronës, Sienës, Livornos dhe Kievos

Sulmuesi shqiptar Erjon Bogdani është duke vendosur një rekord personal në Itali, duke qenë vetëm një hap larg ndeshjes së tij të 300-të jubilare, në vitin e tij të dhjetë futbollistik në vendin fqinj. Në fakt ai pritej ta rrumbullakonte këtë shifër në ndeshjen e humbur të Kievos kundër Palermos të shtunën e kaluar, por trajneri Di Karlo nuk e futi për asnjë minutë në lojë Bogun, ndërkohë që 32-vjeçari shqiptar mund ta realizojë atë kundër Livornos, një tjetër ish-skuadër e tij. Sulmuesi i Kievos ka veshur bluzat e Rexhinës, Salernitanës, Veronës, Sienës, Livornos dhe Kievos (ku ndodhet aktualisht), duke koleksionuar 174 paraqitje në Serinë A, 106 në Serinë B, 16 në Kupën e Italisë dhe 3 në turne të ndryshëm: 299 në total. Karriera në Itali, e ish-sulmuesit të Partizanit (Shqipëri), Gençlerbirlixhisë (Turqi) dhe Kroacia Zagreb (Kroaci), nisi janar të vitit 2000, kur u transferua të Rexhina (4 sezone, 37 gola, 4 gola), përpara se ai të huazohej te Salernitana për një sezon, e më pas te Verona e Serisë B, ku realizoi edhe sezonin e tij më të mirë në Itali, me 17 gola, duke qenë golashënuesi i katërt më i mirë i këtij kampionati. Nga Verona u shit te Siena për shumën e 1.5 milionë, duke realizuar për këtë skuadër 13 gola në një sezon e gjysmë. Golashënuesi i tretë më i mirë i Kombëtares shqiptare (12 gola), ndryshoi sërish skuadër, duke u shitur te Kievo për 3 milionë euro, ndërkohë që u huazua te Livorno (nuk bëri një sezon të mirë: 2 gola në 25 ndeshje). Në fillim te sezonit 2008-2009 u rikthye sërish te Kievo, ku ndodhet në sezonin e tij të fundit, të paktën sipas kontratës. Bogdani ka realizuar 54 gola në total, pa përfshirë këtu një duzinë golash nëpër ndeshjet miqësore.

13 Prill 2010