Pas dyzimeve për qëndrimin e tij, SHBA i heq Pakistanit ndihmën prej 800 milionë dollarësh

SHBA-ja ka njoftuar se ka ndërprerë ndihmën ushtarake në vlerë prej 800 milionë dollarë për Pakistanin. Shefi i Stafit të Shtëpisë së Bardhë, Bill Daley deklaroi për televizionin ABC se Pakistani ka “ndërmarrë disa hapa që na japin arsye për të ndërprerë ndihmën”.

Ai tha se në Pakistan ka pasur “shumë dhimbje” pas sulmit amerikan, në të cilin u vra Osama Bin Laden në muajin maj. Ai ka pranuar se “Pakistani ka qenë një aleat i madh në luftën kundër terrorizmit”, dhe ka shtuar se marrëdhëniet duhet të përmirësohen me kalimin e kohës.

Presidenti Obama takohet me udhëheqës të Kongresit për shkurtimin e borxhit

Sekretari amerikan i thesarit Timothy Geithner tha se presidenti Obama kërkon marrëveshjen më të madhe të mundshme për pakësimin e borxhit, por republikanët kanë kundërshtuar një paketë 4 trilionë dollarëshe që kërkon Shtëpia e Bardhë. Zoti Geithner foli dje në një program televiziv, disa orë para një takimi të planifikuar mes presidentit dhe udhëheqësve të Kongresit. Presidenti ka punuar me ligjvënës të shquar gjatë ditëve të fundit për të arritur një marrëveshje që do të rriste tavanin e borxhit kombëtar deri në afatin e 2 gushtit.

Zoti Geithner i tha programit Meet the Press se dështimi për arritjen e një marrëveshje për të rritur shumën e parave që qeveria mund të marrë hua do të shkaktonte dëme katastrofike për ekonominë amerikane. Kryetari i Dhomës së Përfaqësuesve John Boehner tha dje se ka hequr dorë nga përpjekjet për të arritur një marrëveshje gjithëpërfshirëse me Shtëpinë e Bardhë për të pakësuar deficitin federal me 4 trilionë dollarë gjatë 10 vjetëve të ardhshme.

Zoti Boehner deklaroi se i kishte thënë Presidentit Obama se tani kërkon një marrëveshje për pakësimin e deficitit në masën 2 trilionë dollarë meqë Shtëpia e Bardhë nuk do të kërkojë arritjen e një marrëveshje pa rritur taksat.

Republikanët kanë qenë të paepur në pozicionin e tyre se nuk do të mbështesin rritjen e taksave.

Zoti Boehner tha se negociatat duhet të përqendrohen në pakësimin e deficitit siç është identifikuar nga një grup dypartiak i udhëhequr nga nënpresidenti Joe Biden.

Më parë zoti Obama tha se demokratët dhe republikanët duhet të dalin nga pozicionet e tyre komode dhe të bëjnë sakrifica politike për të përballur sfidat fiskale të vendit.