Pensionet e minatorëve, gjashtë nën hetim

Abuzimet me pensionet kanë çuar për ndjekje penale gjashtë pensionistë në qytetin e Pogradecit. Mësohet se për të përfituar pensione më të majme, ata kanë paraqitur dokumente të falsifikuara në dosjet e tyre, por janë zbuluar nga ana e Sektorit të Krimit Ekonomik pranë Drejtorisë së Policisë së Korçës. Ngjarja ka ndodhur në qytetin e Pogradecit, në dosjet e pensioneve të zyrës së sigurimeve shoqërore. Ka qenë Krimi Ekonomik që, në bazë të informacioneve të marra në rrugë operative, ka kryer një kontroll pranë degës së sigurimeve në qytetin e Pogradecit, ku banojnë gjashtë pensionistët të cilëve u janë gjetur në dosje dokumente të rreme. Ndaj gjashtë pensionistëve ka nisur procedimi penal në gjendje të lirë. Burimet e policisë lokale thonë se bëhet fjalë për: Ilia Bllazhda 54 vjeç, Bujar Lipo 56 vjeç, Stavri Mëngri dhe Durim Mançellari, përkatësisht 53 dhe 51 vjeç, Bujar Selfollari 52 vjeç dhe 55-vjeçari Riza Bufi. Ata janë paraqitur me dokumente të falsifikuara si minatorë. Të gjashtë pensionistët kanë qenë punonjës të minierës së hekur-nikelit në Gur të Kuq, por nga verifikimet e kryera ata kanë rezultuar se nuk kanë qenë minatorë të nëntokës, siç kanë përfituar për disa vite nga pensioni shtetëror, por kanë punuar mbi tokë.

Ju.Dh.