Përcillet Aquino, Presidentja e popullit

 

Mijëra filipinas kanë marrë dje pjesë në ceremoninë e varrimit të ish-presidentes së tyre të parë femër, Corazon Aquino, e cila u nda nga jeta të shtunën në mëngjes, në moshën 76-vjeçare. Aquino njihet si “Presidentja e fuqisë së popullit” në këtë vend, pasi solli demokracinë rreth një çerek shekulli më parë, duke i dhënë fund dy dekadave të regjimit diktatorial. Njerëzit pritën në radhë të gjata për t’i dhënë lamtumirën e fundit asaj, megjithëse binte shi. Aquino ka shërbyer si presidente për gjashtë vite, pasi uli nga pushteti Ferdinand Marcos-in, në vitin 1986. Në pemët dhe rrugët e vendit, në kutitë postare dhe në krahët e tyre, njerëzit kishin vendosur shirita të verdhë, simboli i saj kundër regjimit të Marcos-it. Presidentja aktuale, Gloria Macapagal Arroyo tha se do të përfundonte shpejt vizitën e saj në Shtetet e Bashkuara, për të marrë pjesë në funeralin e Aquinos. Arroyo ka vendosur 10 ditë zie kombëtare, për të nderuar presidenten simbol të Filipineve. Në një deklaratë të shtunën, pas lajmit të vdekjes së saj, Arroyo e quajti Aquinon një “thesar të kombit që ka ndihmuar vendin tonë për ditë më të ndritshme” (edhe pse Aquino gjatë viteve të fundit ka marrë pjesë në demonstratat e organizuara në rrugë kundër presidentes aktuale). Trupi i Aquinos u ekspozua për herë të fundit në “La Salle Green Hills”. Njerëzit e kanë vlerësuar Aquinon si një ikonë ndërkombëtare të demokracisë. Ajo njihej edhe për kontaktin spiritual në Filipine dhe për lidhjen më të fortë mes njerëzve dhe besimit.