Përfundojnë punimet e gjysmës së superstradës Sarandë - Konispol

Ministri i Transporteve Sokol Olldashi inspekton punimet

Kanë përfunduar punimet në 22 kilometra të superstradës Sarandë – Konispol. Dje ministri i Transporteve Sokol Olldashi ka inspektuar punimet për realizimin e kësaj vepre që do të rrisë ndjeshëm cilësinë e qarkullimit në këtë zonë. Kjo vepër është një investim i përbashkët mes qeverisë shqiptare dhe asaj greke me vlerë 29 milionë euro.
Sipas Ministrisë së Transporteve deri tani ka përfunduar asfaltimi në më shumë se gjysmën e rrugës që ka një gjatësi totale prej 40 kilometrash.
Superstrada Sarandë – Konispol përbëhet nga dy seksione, Qafë Botë – Krane dhe Krane – Sarandë. Aktualisht përqendrimi më i madh i punimeve është te dy urat, ajo e Kranes dhe e kryqëzimit të Delvinës, deklaron Ministria e Transporteve.
Segmenti me gjatësinë 40 km dhe gjerësi 9.5 m përbëhet nga 2 korsi, ku shpejtësia e lëvizjes është 80-100 km/orë .
Vlera e investimit për segmentin Sarandë – Konispol është 29 milion Euro, i cili është një investim i përbashkët i qeverisë greke dhe shqiptare.
Gjatë inspektimit të punimeve mbikëqyrësit e tyre deklaruan se deri dje janë kryer 70 për qind e punimeve. Rruga përbehet nga 12 ura dhe shume vepra të tjera arti.
Ministri Olldashi gjatë inspektimit u ndal edhe në segmentin turistik Kanali Cukës – Butrint, ku ka filluar asfaltimi i 3 km të parë.
Ritmet e punimeve në këtë segment kanë hasur në vonesa si pasojë e kalimit të projektit në zona që rezultuan arkeologjike.
Ministria sqaron se për këtë arsye ky projekti u rishikua në tërësinë e tij duke dhënë një zgjidhje përfundimtare rrugës pa dëmtuar vlerat arkeologjike të zonës si dhe parkun e Butrintit.
Segmenti Kanali Cukës – Butrin ka një gjatësi prej 12 km dhe gjerësi 9 m dhe investimi ka një vlerë prej 1.2 miliard lekë.