Përfundon takimi në PDK, Thaçi nuk merr pjesë

Mbledhja e kryesisë së PDK-së ka përfunduar pa ndonjë rezultat apo qëndrim konkret lidhur me krizën politike në vend. Në këtë takim nuk ka marre pjesë kryetari i PDK-së Hashim Thaçi, i cili vazhdon të jetë në konsulta me përfaqësuesit ndërkombëtarë.
 

Pas takimit u prononcua shefi i Grupit Parlamentar të PDK-së, Adem Grabovci, i cili deklaroi se PDK do të bëjë çdo gjë që është e mundshme për të gjetur zgjidhje qe do ta nxirrte vendin nga kriza aktuale.
 

Ai po ashtu ka konfirmuar se për PDK-në është i papranueshëm propozimi i kreut të LDK-së, Isa Mustafa, që të arrihet një marrëveshje që zgjedhjet të mbahen vitin e ardhshëm. Grabovci tha se një gjë e tillë nuk mund të ndodhë për shkak se bie ndesh me Kushtetutën, dhe sipas tij, vendi më këtë rast do të shkonte nga kriza në krizë.