Përkujtohet 60-vjetori i pushkatimit të grupit të Korçës

Shoqata Antikomuniste e të Përndjekurve Politikë Demokratë përkujtoi të hënën në Muzeun Kombëtar 60-vjetorin e dënimit nga diktatura të disa personaliteteve antikomuniste nga qarku i Korçës. Në këtë ngjarje të vitit 1948, e cila, në variantin zyrtar të historisë së regjimit komunist, njihej si asgjësimi i grupit agjento-sabotator të Korçës, u dënuan me vdekje katër personalitete të njohura korçare, një u vra në hetuesi dhe disa të tjerë me burgime të ndryshme. Historiani Uran Butka foli rreth jetës të të pushkatuarve, gjyqit të tyre dhe gjyqeve të periudhës 1945-‘48 në tërësi, një periudhë kur u vranë në shkallë të gjerë shumë elementë antikomunistë.

Të pushkatuarit ishin:

Mehmet Babani, jurist, kishte mbaruar studimet në gjimnazin “Zosimea” të Janinës, studimet juridike në Stamboll dhe punonte si noter i prefekturës së Korçës.

Sipas dokumenteve të gjyqit, Babani akuzohej se kishte shkuar në Devoll për të organizuar ushtrinë kundër qeverisë, kishte bërë propagandë kundër pushtetit dhe kishte lidhje me anglo-amerikanët.

Nafiz Babani, oficer, kishte mbaruar akademinë ushtarake në Itali. Në vitin 1939 ai ishte oficer në Sarandë dhe organizoi rezistencën antifashiste në atë qytet. Një këngë popullore e përshkruan kështu rolin e tij në këtë ngjarje: “M’u te çezma, m’u te mani/ luftonte Nafiz Babani”.

Fadil Garo, tregtar, kishte një fabrikë trikotazhi në Korçë.

Nexhip Lamçe, fermer, i cili përdori i pari në Korçë makinat bujqësore si traktor dhe makinë shirëse, zotëronte gjithashtu edhe një agjenci udhëtimesh.

Qazim Frashëri u vra në hetuesi dhe për të u tha që u rrëzua nga shkallët.

Reshat Kripa, kryetar i Shoqatës Antikomuniste të të Përndjekurve Politikë Demokratë, dega e Tiranës, referoi për persekutimin e familjarëve pas vrasjes së të afërmve të tyre.