'Përshëndetje popull, harxhuam 200 mijë euro për qejfet tona'
Protagonistët kryesor të këtij aksioni, ishin kryeministri Hashim Thaçi, zëvendëskryeministri Behxhet Pacolli, ministri i punëve të jashtme Enver Hoxhaj, presidentja e vendit Atifeta Jahjaga, ministrja e Tregtisë Mimoza Kusari dhe ministrja e integrimeve Vlora Çitaku. Kurse, vendosja e tyre në qendër të kryeqytetit, sipas Vetëvendosjes është që populli, i cili është ne gjende të rënd t’ shohë zyrtarët e lartë shtetëror që me lehtësi po i keqpërdorin paratë e taksapaguesve të varfër.
Aktivisti i Lëvizjes “Vetëvendosje”, Albana Gashi, me këtë rast tha se në emër të përfaqësimit në arenën ndërkombëtare, kryeministri vet i 50-ti ia mësyu New York-ut, për t’i shpenzuar për qejf 200 mijë euro të taksapaguesve.
“Kryeministri i qejfeve tha se nuk i bëhet vonë për reagimin e opozitës dhe se kjo vizitë e tij ka qëllim madhor dhe se është një paraqitje e dinjitetshme për Kosovën. Ne i themi kryeministrit, që Kosova ka nevojë për përfaqësim të dinjitetshëm nga njerëz të dinjitetshëm, të pa korruptuar dhe kompetent, e jo nga ministra të korruptuar dhe anëtarë të tjerë të delegacionit, të cilët as vet nuk e dinin qëllimin e kësaj vizite, apo më mirë të themi këtij ekskursioni, përveç zhvatjes së mëditjeve të majme, sipas llogarive të bëra, ky ekskursion buxhetit të Kosovës, i kushtoi rreth 200 mijë euro. Këto mjete kanë mundur të jenë 5 mijë ndihma sociale në Kosovë, 4445 pensione minimale, 1176 paga minimale në Kosovë, 222 bursa për studentë të UP-së, 1110 pensione për invalidë të UÇK-së”, ka thënë Gashi.
Sipas tij, edhe kësaj radhe Qeveria tregoi se sa me lehtësi, mund t’i keqpërdor paratë e tatimpaguesve .
“Edhe në këtë rast, kryeministri dhe qeveria e tij tregoi se sa lehtë mund t’i keqpërdorë mjetet e tatimpaguesve, pa fije turpi e ndërgjegje. Pa e qarë kokën për hallin dhe mjerimin që po e pllakos çdo ditë popullin e Kosovës”, tha ajo.
Ndërsa, qytetarët shprehnin mendime të ndryshme, rreth vizitës së delegacionit të Kosovës në New York.
Disa nga ta e quanin absurde një shpenzim të tillë, në një kohë kur gjendja sociale dhe ekonomike në vend është tejet e rëndë.E për disa të tjerë, vizitat e tilla janë të domosdoshme për Kosovën, pa marrë parasysh harxhimet.
Besim Gashi thotë se një gjë e tillë nuk është dashur të ndodh, në një kohë kur populli s’ka bukë të hajë, ndërsa politikanët harxhojnë mija e qindra euro, nëpër vizita.
“Marre është për ta duhet me u qu krejt populli në këmbë i madh dhe i vogël me i hjek këta prej këtu ”, tha ai.
Edhe për Mirsad Krasniqi, kjo që ka ndodhur me vizitën në Neë York dhe me shumën e lartë të parave të shpenzuar atje është krejtësisht absurde.
“Është absurde, tërë kjo papunësi, tërë kjo krizë çfarë mbretëron këtu, ata të shkojnë e të harxhojnë qindra mijëra euro, nuk është mirë”, tha Krasniqi.
Por Muhedin Gashi mendon ndryshe. Sipas tij ky delegacion ka meritat e veta dhe vizita në New York është një sukses i madh për Kosovën.
“Hallal iu qofshin se kanë merita. Sepse ne kemi qenë një popull, që na kanë quajtur sharragji, e sot ka mbërri shqiptari me shku në Amerikë me përfaqësuar kombin shqiptar. Mos të iu mashtrojnë se këta që po e bëjnë këtë, janë kundër politikës.S’janë ato harxhime asgjë. Kur shqiptari ka arrit me shku në Amerikë, është një sukses i madh me përfaqësuar kombin shqiptar”, u shpreh Gashi.
Vetëvendosje ka bërë thirrje qytetarëve që të organizohen kundër kësaj Qeverie, motoja e së cilës është zhvatje pensionesh, ndihmash sociale, bursa studentësh e zhvatje ndërmarrjesh. /kosovapress/