Plagët e Gjergj Elez Berishës

E kërkova dhe e gjeta, ashtu shtrirë në byth’ të pishës

Lëngonte me plagë të shumta, trup’ i Gjergj Elez Berishës.

- Eh, si qenke katandisur, komandanti legjendar.

- I kam marr’ do plagë të rënda, në beteja me… shqiptarë!

- Pa m’trego plagët e tua, o ti Gjergj Elez Berisha!

Se ti dhe llafos pa fund, po dhe hije na bën pisha.

- Kjo këtu është plag’ e parë, që e kam në këtë këmbë

Ish në zgjedhjet ‘92, sa më dhembi o moj nënë...!

...Kjo plaga të këmba tjetër, është nga referendumi

Kur Kushtetutën që bëra, vajti dhe e mori lumi.

Kjo plaga këtu te barku, që dhe zorrët m’i tregon

Është që nga ‘97-a, e shikon a s’e shikon…!

- Paska qenë luft’ e madhe, kush o Salë qe kundërshtari?

- Ku di unë? U ngrit mileti, s’merrej vesh kush ish i pari.

- Po kjo tjetra, si me shpatë, që ka dalë brinjë më brinjë?

- Është e tenderit të rrugës, që nga Durrësi në Morinë...

- Po ti paske dhe një plagë, që dhe veshët t’i ka shpuar.

- Është nga lufta e Gërdecit, nuk e di o i uruar?

- Obobo si të ka marrë, çdo hero do kishte vdekur.

- Mua jo, unë jam Berisha, nuk kam kokë, po kam një hekur.

- Po ti ke dhe dekorata. Një nga një, a s’mi tregon?

- Janë t’fitoreve të tua, apo dhe t’popullit tonë?

- Dekoratat i kam vetë, nuk i ndaj, është me zarar.

Vazhdojmë shpejt, ku e lamë, se një këmbë e kam në varr...

...Kjo është për zgjedhjet e para, që fitoi Demokracia

Është e 22 Marsit, ku gëzoi tërë Shqipëria

Tjetra është 26 Maji, qind’ për qind kur fituam

Ku nga rezultati ynë, gjithë armiqtë u tërbuan...!

- Kjo ftesa që ke në qafë, nga NATO qenka nënshkruar.

- Mos të ishte kjo mor djalë, do më kishin përvëluar!

Kjo ishte zjarrfikësja ime, që ma fiku shpejt Gërdecin

Se do më kishin vënë poshtë, e do më fusnin bodecin...

- Po kjo lista plot me shifra, që ke varur në kurriz?

- Ah, po, ky është formulari, deklarim’ i pasurisë

Bëjmë biznes brenda familjes, mbahemi me lekë hua

Unë i jap para vajzës, pastaj vajza m’i kthen mua.

- Epo mirë, o Gjergj i madh, tash më thuaj në ke nge`

Ty në krye do të kemi, përgjithmonë këtej nga ne?

- Po nuk erdhi vetë balozi, të më rrafi me topuz.

Mue në krye do më keni, vidh e hidh ndonjë romuz.