Policia e Korçës në gatishmëri të plotë për zgjedhjet, 439 efektivë për ruajtjen e 422 qendrave të votimit

Strukturat e Drejtorisë Vendore të Policisë Korçë janë angazhuar maksimalisht për të garantuar mbarëvajtjen e procesit zgjedhor në qarkun juglindor të vendit.

Në zbatim të planit të masave, Policia ka përfshirë gjithsej 439 efektivë për të siguruar 7 KZAZ-të dhe 422 qendrat e votimit në territorin e qarkut.

Pas përfundimit të shpërndarjes së materialeve zgjedhore në të gjitha qendrat e votimit, punonjësit e Policisë të caktuar për ruajtjen fizike të objekteve zgjedhore janë paraqitur në vendngjarje në orën 18:00 të ditës së sotme dhe kanë marrë në ruajtje të gjitha pikat e votimit.

Ruajtja e këtyre objekteve do të vijojë deri në orët e para të mëngjesit të nesërm, kur do të nisin punën Komisionet e Qendrave të Votimit dhe Komisionet Zonale të Administrimit Zgjedhor.

Nga Policia e Korçës njoftohet se të gjitha detyrat e përcaktuara në planin operacional janë realizuar me përpikëri dhe sipas procedurave standarde.

Në ambientet e Drejtorisë Vendore të Policisë është ngritur një grup drejtues për monitorimin në kohë reale të situatës, menaxhimin e informacionit dhe koordinimin me mediat dhe publikun.

Deri në këto momente, situata e rendit dhe sigurisë publike në qarkun e Korçës paraqitet e qetë dhe pa incidente. Policia garanton se do të vijojë të qëndrojë në gatishmëri të plotë për të siguruar një proces zgjedhor të rregullt dhe të qetë.