Pozitë-opozitë, sherr për rrogën mesatare mujore të shqiptarëve

Ndryshimet në buxhetin e shtetit miratohen me 75 votat e mazhorancës. Opozita mungon në votim

Parlamenti votoi me 75 vota pro ndryshimet në buxhetin e shtetit për vitin 2010. Shkurtimet e shpenzimeve në administratë kanë shkaktuar replika mes dy forcave më të mëdha politike në Kuvend. Heqja e privilegjeve financiare për deputetët, heqja e shoferëve, makinave, shkurtimet e dietave për administratën shtetërore kanë zënë vend kryesor në ligjin që rishikoi buxhetin e vitit 2010. Me votimin e ndryshimeve të buxhetit mazhoranca ka treguar se ka ditur të ruajë numrat në Kuvend, por vështirësia për ndonjë surprizë të papritur ka detyruar të gjithë ministrat të jenë të pranishëm në seancën e fundit të sesionit të dytë parlamentar për Legjislaturën e 18-të.

Debati për buxhetin

Opozita akuzoi qeverinë si të paaftë, duke theksuar se një qytetar shqiptar sot merr pagë mujore mesatare 242 euro, e cila është më e ulëta në rajon. Duke iu drejtuar Kryeministrit Berisha lidhur me rritjen e pagave dhe pensioneve, kreu i grupit parlamentar të PS-së, Gramoz Ruçi, tha se "një qytetar shqiptar merr 242 euro në muaj dhe se ky është niveli më i ulët në rajon". Kreu i grupit parlamentar të PS-së, Gramoz Ruçi, akuzoi Kryeministrin Berisha se po mban krizën politike të pazgjidhur. Kreu i qeverisë theksoi nga foltorja e Kuvendit se shkurtimi në buxhet ka disa arsye themelore shumë të justifikuara. “Këtë vit ne sugjeruam shkurtimin e shpenzimeve. Kjo vjen para së gjithave si një vendosmëri e kësaj qeverie për të çuar mesazhet më pozitive në qarqet financiare të vendit, Europës dhe më gjerë”, tha Berisha.

Përplasja për shifrat

Duke mbrojtur draftin e rishikimit të buxhetit 2010, Kryeministri pohoi se ekonomia shqiptare ka dyfishuar rritjen e saj. “Në vitin 2008 ekonomia jonë u rrit me 8%, më 2009-n me 3.4%. Në 6-mujorin e parë të 2010-s të ardhurat e mbledhura me taksat kanë arritur në 104 miliardë lekë, ndryshe nga 50 miliardë lekë të mbledhura nga opozita e sotme në vitin 2004”, tha Berisha. Por, menjëherë pas Berishës ka reaguar kreu i grupit parlamentar të Partisë Socialiste, Gramoz Ruçi, që deklaroi se qeveria nuk pranon se vendi është në krizë ekonomike. Në seancën e fundit të Kuvendit, duke reaguar pas deklaratave të Kryeministrit Berisha, kreu i grupit parlamentar të PS-së, Gramoz Ruçi, tha se “opozita që në nëntor ka bërë një mbledhje të forumit më të lartë të saj dhe ka paralajmëruar për krizën dhe ka kërkuar të ndryshohet buxheti". Sipas Ruçit, qeveria u vonua 9 muaj për ta ndryshuar buxhetin, ndërsa ritheksoi se "po të kishte dëgjuar alarmin tonë, ekonomia nuk do ishte këtu ku është sot”.

#