“Presidenca çeke e BE-së mbështet Shqipërinë në procesin e aplikimit”

Ministrja e Integrimit Majlinda Bregu, merr garanci gjatë vizitës zyrtare në Çeki 

TIRANE - Ministria e Integrimit, Majlinda Bregu, ka marrë garanci se Presidenca Çeke e BE-së mbështet Shqipërinë në hapat e mëtejshëm të procesit të integrimit evropian. Këtë garanci, Ministrja e Integrimit e ka marrë gjatë një vizitë pune që zhvilloi në Pragë, me ftesë të zëvendëskryeministrit për çështjet e Bashkimit Evropian, Aleksandër Vondra.
Në axhendën e ministres Bregu ishte parashikuar dhe një takim pune me zëvendësministrin e Parë të Punëve të Jashtme Tomas Pujar.
Gjatë dy takimeve ministrja Bregu i njohu të dy personalitetet çeke me zhvillimet dhe me hapat e ndërmarra nga qeveria dhe shteti shqiptar, për integrimin në Bashkimin Evropian. Në kuadër të marrjes së presidencës së BE-së nga Çekia, biseda u fokusua në rolin që Republika Çeke pritet të luajë në gjashtëmujorin e parë të këtij viti.
Ministria Bregu mori konfirmimin se gjatë kësaj presidence, Çekia do të angazhohet dhe do të vazhdojë të trajtojë si prioritet zgjerimin me vendet e Ballkanit Perëndimor. Në këtë kontekst, përfaqësuesit e lartë të  Republikës Çeke dhe njëkohësisht të Këshillit të Bashkimit Evropian deklaruan se mbështesin Shqipërinë në hapat e mëtejshëm të procesit të integrimit evropian.
Gjatë bisedës të zhvilluar me ministren Bregu, zëvendësministri i Parë i Punëve të Jashtme Tomas Pojar, pohoi se “është shumë e rëndësishme të vazhdojmë bisedimet për marrëdhëniet tona bilaterale, është në interesin tonë të vazhdojmë me procesin e integrimit evropian të rajonit përfshirë edhe Shqipërinë”.
“Është shumë e rëndësishme të vazhdojmë bisedimet për marrëdhëniet tona bilaterale, është në interesin tonë të vazhdojmë me procesin e integrimit evropian te rajonit përfshirë edhe Shqipërinë. Kemi folur me detaje për këtë proces, dhe i urojmë Shqipërisë shumë fat në rrugën e integrimit evropian, ne do të bëjmë të pamundurën për ta mbështetur vendin tuaj”, tha zëvendësministri Pojan.
Bashkëbiseduesit i kushtuan vëmendje disa pikave të rëndësishme, që kishin të bënin me ecurinë e përmbushjes së detyrimeve të Shqipërisë në kuadër të MSA-së, siç ishin përafrimi i legjislacionit shqiptar me atë komunitar, hapat e mëtejshëm që priten të ndërmarrë qeveria shqiptare me qëllim anëtarësimin e plotë të Shqipërisë në BE dhe ecurinë e dialogut për liberalizimin e vizave.
Ministrja e Integrimit, Majlinda Bregu u përqendrua kryesisht në prezantimin e situatës në Shqipëri, përmbushjen e reformave të rëndësishme nga qeveria shqiptare, në kuadrin e Integrimit Evropian. Në këtë kuadër u diskutua mbi progresin e arritur në fushat kryesore të detyrimeve për Integrimin Evropian si reformat, zgjedhore, në drejtësi, ajo në administratën publike, situatën ekonomike si dhe në luftën kundër korrupsionit.