Procesverbal datë 05.05.2010
PROCESVERBAL datë 05.05.2010, ora 14:00
Drejton Mbledhjen: JOZEFINA ÇOBA TOPALLI KRYETARE KUVENDI
Rendi i ditës:
Miratimi i programit të punës së Kuvendit për periudhën 3 maj 10 qershor 2010.
Miratimi i kalendarit trejavor të punimeve të Kuvendit për periudhën 3 - 20 maj 2010.
Të pranishëm:
Znj. Jozefina TOPALLI Kryetare Kuvendi
Z. Astrit PATOZI Kryetar i Grupit Parlamentar të Partisë Demokratike
Z. Ardian TURKU Zëvendës Kryetar Kuvendi
Z. Paulin STERKAJ Sekretar i Grupit Parlamentar Lëvizja Socialiste për Integrim
Mungojnë:
Z. Nasip NAÇO Zëvendës Kryetar Kuvendi
HAPET MBLEDHJA
Jozefina Topalli: Mirëdita! Sot në rendin e ditës së mbledhjes së Konferencës së Kryetarëve do të shqyrtojmë projektkalendarin dhe programin e punës së Kuvendit. Kalendari është mjaft i pasur me ligje, marrëveshje e seanca dëgjimore. Në kalendar janë përfshirë: ( lexon pjesë nga projektkalendari i punës).
Projektligj Për disa shtesa në ligjin nr.8691, datë 16.11.2000 Për prodhimin dhe tregtimin e duhanit dhe të cigareve, të ndryshuar.
Projektligj Për kundravajtjet administrative.
Projektligj Për sektorin minerar në Republikën e Shqipërisë.
Projektligj Për disa ndryshime në ligjin nr. 8246, datë 1.10.1997 Për institutin e integrimit të përndjekurve.
Projektligj Për ratifikimin e marrëveshjes ushtarake grant ndërmjet Këshillit të Ministrave të Republikës së Shqipërisë dhe Qeverisë së Republikës së Turqisë.
Keni ndonjë vërejtje, apo sugjerim?
Ndërsa në rendin e ditës së seancës së nesërme, Drejtoria e Seancave Plenare ka parashikuar:
1. Diskutime për çështje jashtë rendit të ditës (deri 60).
2. Miratimi i procesverbalit të seancës plenare datë 29.4.2010.
3. Njoftimi i kalendarit të punimeve të Kuvendit për periudhën 3 20 maj 2010.
4. Projektligj Për aderimin e Republikës së Shqipërisë në Konventën e Roterdamit Për procedurën e miratimit të mëparshëm të njoftuar për disa kimikate dhe pesticide të rrezikshme në tregtinë ndërkombëtare.
5. Projektligj Për disa shtesa në ligjin nr.8691, datë 16.11.2000 Për prodhimin dhe tregtimin e duhanit dhe të cigareve, të ndryshuar.
6. Projektrezolutë për vlerësimin e punës të KKRT-së për vitin 2009.
7. Projektrezolutë për vlerësimin e punës të Autoritetit të Konkurrencës për vitin 2009.
Keni ndonjë gjë për të shtuar??
Astrit Patozi: Më duket korrekt. Nuk kam asnjë vërejtje.
Paulin Sterkaj: Nuk kam asgjë për të shtuar. Jam dakord me këtë kalendar dhe program.
Lulzim Lelçaj: Në seancën e nesërme është për tu diskutuar edhe projektligji Për disa shtesa dhe ndryshime në ligjin nr. 10.267, datë 15.04.2010, Për ratifikimin e marrëveshjes së mandatimit ndërmjet Republikës së Shqipërisë dhe Deutsche Bank A.G. London e J.P. Morgan Securities L.t.d si menaxherë bashkëdrejtues për transaksionin e emetimit të eurobondit deri në 400 mil euro dhe miratimin e dokumenteve të tjerë të transaksionit: një marrëveshje kjo e cila është diskutuar në komisione. Për arsye kohe duhet që të votohet në seancën e nesërme.
Jozefina Topalli: Dakord. Meqënëse jemi të gjitha dakord, miratohet kalendari dhe programi i punës.
Ju falemnderit!
Mbledhja deklarohet e mbyllur.
Konferenca e Kryetarëve në përfundim të diskutimeve miratoi programin e punës dhe kalendarin e punimeve të Kuvendit. Ky kalendar dhe program pune do ti njoftohen Kuvendit në seancë plenare në datën 6.05.2010.