Pronat, banorët e Dukatit sfidojnë policinë

PROTESTA/ Pas shoqërimit të 6 protestuesve, të tjerë kanë ribllokuar rrugën për dy orë. Vargu i mjeteve, deri në Llogora

VLORË - Një protestë e nisur mëngjesin e së martës rreth orës 09:00 që e çoi në rreth 3 kilometra vargun e automjeteve që i ishin drejtuar Sarandës apo Vlorës, u përmbyll mbrëmjen e kaluar pas një bllokimi të dytë, ku protestues, kryesisht të rinj, kanë hedhur edhe vaj në rrugë për të mos lejuar kalimin e mjeteve.

Mësohet se shkak për riprotestën ishte ndalimi i gjashtë prej personave që morën pjesë në protestën e paradites të banorëve të Dukatit, Tragjasit dhe Orikumit, dhe shoqërimi i tyre për në komisariat. Një gjë e tillë ka bërë që gjatë pasdites, protestues kryesisht të rinj të bllokojnë rrugën për së dyti dhe të kërkojnë lirimin e të ndaluarve.

Përgjatë pothuajse dy orëve aksi ka qëndruar i bllokuar, teksa mësohet se protestuesit që kanë qenë të mbuluar me bluza për mos t'u njohur kanë hedhur edhe vaj në rrugë për të qenë të bindur në moskalimin e mjeteve. Mësohe se radha e automjeteve ka mbërritur deri në Qafën e Llogorasë.

Vetëm pasi nga policia është bërë lirimi i të shoqëruarve, ata janë larguar nga rruga për të bërë të mundur rikthimin e qarkullimit. Për shkak të vajrave të hedhura në rrugë, pas lirimit ka ndërhyrë ndërmarrja e rrugëve për pastrimin e saj.

Pas kësaj ka vijuar qarkullimi normal, ndërsa protestuesit janë kthyer në banesat e tyre, ndërkohë që nga ana e policisë nuk është marrë ndonjë masë ndaj tyre.

Por edhe gjatë paradites për rreth një orë, banorë të Dukatit zunë rrugën duke mos lejuar kalimin e automjeteve në aksin Vlorë-Sarandë.

Shqetësimi për mosmarrjen e asnjë certifikate pronësie, kur tokat e tyre janë të lira, ka ribashkuar banorët në protestë. "Përcaktimi i kufijve historikë dhe gjeografikë të Dukatit dhe administrimi i tyre" ka qenë një kërkesë e paraqitur nga banorët.

Sipas tyre, kjo nënkupton të drejta të plota mbi tokat e të parëve, pasi sipas protestuesve është një vendim i Këshillit të Ministrave që synon të privatizojë tokën që kanë nën administrim banorët e Dukatit. "Kthimi i pronave banorëve të fshatit Dukat nëpërmjet dhënies së certifikatës së pronësisë nga ZRPP", ishte një kërkesë e dytë.

Protestuesit thanë se një dokument i tillë nuk disponohet edhe pse tokat janë të tyre të trashëguara brez pas brezi. Banorët thanë se "rikthimi i pronës te i zoti duhet të kryhet sipas ligjeve në fuqi dhe sipas konceptit pronë private".

Ndërkaq një tjetër kërkesë ishte "heqja e menjëhershme e postbllokut të bazës Ushtarake dhe lejimi i turistëve për në parkun e Orikut, si dhe lejimi i banorëve të Dukatit për në Karaburun".

Sipas banorëve, kjo tashmë nuk ndodh, pasi baza ushtarake qëndron e mbyllur dhe në ambientet përreth saj nuk lejohet njeri, pa pasur më parë një leje nga autoritetet ushtarake.

"Marrja e një vendimi, në formë referendumi ose në formë demokratike për çdo vendim të shtetit shqiptar, që mund të cenojë pasurinë, lirinë, shëndetin, ose jetën e banorëve të Dukatit, ishte një tjetër kërkesë e protestuesve.

Sipas tyre, katër kërkesat e bëra publike nga ta, do të jenë në qendër të zhvillimeve të mëvonshme. Ata kanë paralajmëruar se, nëse këto kërkesa nuk do të plotësohen, atëherë do të përshkallëzojnë protestat.