Qeveria, nxitje e konkurrencës ndaj biznesit

“Pas një debati mes qeverisë dhe kompanive telefonike në vend është bërë e mundur ulja e tarifës të telefonisë celulare në vend”

Në mbledhjen e përjavshme të qeverisë kryeministri Sali Berisha u përqendrua në nxitjen e konkurrencës së ndershme ndaj Biznesit. Duke cilësuar si një nga qëllimet më madhore të politikës së qeverisë së tij, nxitjen e konkurrencës së ndershme, shefi i qeverisë theksoi se ajo është jo vetëm interesi më madhor i biznesit, por mbi të gjitha i qytetarëve shqiptarë. Sipas tij tregu i lirë dhe mirëqenia janë prioritet i qeverisë së tij. “Ne do bëjmë gjithçka që të funksionojë në Shqipëri konkurrenca e ndershme”- theksoi Berisha. Shefi i ekzekutivit mori si shembull të mirëfunksionimit të kësaj konkurrence, fushën e komunikimit, që sipas tij është bërë një revolucion komunikimi në këto vite, i cili është kyç për zhvillimin, porse është i pandarë nga informimi. “Fusha e komunikimit, e cila është një nga fushat me jetike e qytetarëve në mbarë botën, është e pandarë nga informimi”. Berisha gjithashtu përgëzoi kompanitë e telekomunikacionit të cilat q nga 2005 kanë ulur ndjeshëm çmimet e telefonisë, duke rritur shkallën e komunikimit të telefonisë mobile, e cila është shkalla më e lartë në Evropë në 180%. Kryeministri premtoi internet falas në 1700 pikat të postës shqiptare në të gjithë vendin, duke shënuar në këtë mënyrë hapin përfundimtar drejt Shqipërisë dixhitale.