Qeveria pa politika rurale

Tiranë - Nismat e qeverisë nuk sjellin asnjë dobi për fshatin dhe bujqësinë. Planet e qeverisë për bujqësinë në fshat sjellin vetëm përfitime personale; projekte që plaçkisin dhe ato pak burime të cilat kanë mbetur në zonat rurale që nuk janë në bregdet. Kështu ka deklarua Nënsekretari për Programin e Partisë Socialiste, Ervin Bushtai. Gjatë një konference për shtyp ai theksoi se mungesa e seriozitetit dhe abuzimet qeverisëse do të dëmtojnë rëndë fshatin dhe bujqësinë në vitin e vështirë që kemi hyrë. “Bllofet me ullirin apo me bletën, njësoj si ato për rritjen e paqënë ekonomike, vetëm sa rëndojnë gjendjen ekonomike dhe pritshmërinë për një jetesë dinjitoze në fshat. Në fakt, këto plane djallëzore, si ajo e dhënies së mefshët me konçesion të 1.000 ha tokë shqiptare, fshehin pas tyre skema të tjera korruptive të qeverisë në ikje e sipër”, vijoi ai.

Sipas përfaqësuesit socialist, qeveria po miraton politika dhe masa që japin përfitim vetëm për “familjen” e saj dhe jo për shtresat në nevojë; shtresa që mbajnë mbi kurriz abuzimin dhe përfitimet masive të qeverisë që sot po punon për pensionin e saj.

“Qeveria nuk po ndërmerr asnjë nismë në dobi të banorëve në fshat në këtë vit të vështirë kur dhe dërgesat e emigrantëve janë në rënie: Asnjë masë për të siguruar mbijetesën e tyre. Ndërkohë, ajo vetëm sa ju mbush lugën bosh me përrallat për një superfuqi ulliri në rritje dhe për një begati të pashoq pas 10 vitesh”, tha ai.