Rama: Stërhiqemi nga pakti me PD, duam reformë zgjedhore
Denis Dedej
Kreu i opozitës, Edi Rama i ka kërkuar dje publikisht kryeministrit Berisha që të pranojë reformën zgjedhore dhe përmirësimin e sistemit bazuar në problemet që janë vënë re në zgjedhjet e mëparshme. Por kryesocialisti ka kërkuar që këtë reformë ta kryejë duke respektuar afatet e vendosura në marrëveshjen e nëntorit.
Duam një reformë zgjedhore që të adresojë të gjitha rekomandimet e OSBE/ODIHR për të zgjidhur problemin e vjetër të vërtetësisë e të transparencës së listave zgjedhore që të mos manipulohet më me to. Problemin e identifikimit të zgjedhësve që të mos votohet dot më me karta false apo me dhjetëra herë nga i njëjti zgjedhës. Problemin e numërimit të votave që të mos përsëriten më shfaqjet e shëmtuara të numërimeve maratonë.
Problemin e administratës zgjedhore që procesi i komisionimit të zgjedhjeve të mos jetë më monopol i dy partive të mëdha dhe që KQZ-ja të mos jetë më bandë qeveritare,- tha Rama.
Pas kësaj Rama hoqi dorë nga kushti i opozitës për ndryshime në Kushtetutë duke thënë se është i gatshëm të pranojë ndryshimin e sistemit edhe pa ndërhyrje në ligjin themeltar të shtetit. Me rishikim të sistemit nuk nënkuptojmë ndryshimin, por përmirësimin e tij në funksion të një demokracie më përfaqësuese të mozaikut politik të vendit. Në emër të interesit kombëtar dhe publik të Shqipërisë unë i bëj sot apel për ta konsideruar përmirësimin e sistemit si një punë dobiprurëse për vendin, shoqërinë, politikën shqiptare,- tha Rama duke shprehur mbështetjen për kërkesën e partive të vogla. Për të mbështetur kërkesat e tij Rama i kujtoi Berishës se disa herë ka deklaruar publikisht se është gati të pranojë propozimet e opozitës, por më pas i shmanget atyre.
Duke iu rikthyer ngërçit politik të hasur dy ditë më parë në konferencën e kryetarëve, Rama tha se PS nuk do të tërhiqet nga pakti i 14 nëntorit të vitit të shkuar sepse, sipas tij, këtë pakt nuk e ka bërë me PD-në, por me qytetarët. Ne do vazhdojmë të punojmë intensivisht edhe për miratimin në kohën e parashikuar, por me cilësi të ligjeve që kërkojnë 3/5-tat e votave të parlamentit. Draftet e përgatitura nga qeveria, kryesisht korrigjime të nxituara të ligjeve ekzistuese janë si batanije të vjetra ushtarake të mbushura me arna. U bë një punë e mirë edhe pse e pamjaftueshme me kodet që kaluam fundvitin e shkuar.
Grupi ynë i punës po punon përditë me projektet që do të miratohen në vijim për të cilat ne do të japim votën tonë duke kërkuar vijimësisht që deri në sallën e Kuvendit ato të kalojnë përmes një procesi transparent gjithëpërfshirës,-tha Rama. Për këtë çështje, PS ka ngritur disa grupe pune, të cilat po shqyrtojnë një nga një të gjitha ligjet që kërkojnë shumicë të cilësuar.