Ramush Haradinaj mbërrin në Prishtinë

Lideri i AAK, Ramush Haradinaj mbërrin në Prishtinë. Ai u lirua nga Gjykata ndërkombëtare e Hagës e cila vendosi që ai të lirohet përkohësisht ndërkohë që vendimi përfundimtar në këtë proces gjyqësor pritet të merret pas disa javësh.

Ish-kryeministri i Kosovës Ramush Haradinajt, ish Kryeministër i Kosovës dhe aktualisht kryetar i Aleancës për Ardhmërinë e Kosovës, mbërriti në Aeroportin Ndërkombëtar “Adem Jashari” në Prishtinë ndërsa më pas është shoqëruar nga një numër i madh i forcave të sigurisë së EULEX-it në shtëpinë e tij në lagjen Arbëria.

Nga Aeroporti i Prishtinës, Ramushi është larguar nga një rrugë dytësore ku i është shmangur gazetarëve, mediave dhe qytetarëve që ishin dalë për ta pritur atë.  Në shtëpinë e tij në lagjen Arbëria të Prishtinës ai është pritur nga familjarët e tij.

Procesi i rigjykimit ndaj ish-eprorit të UCK-së dhe dy bashkëluftëtarëve të tij, Idriz Balaj dhe Lahi Brahimaj, pritet të përfundojë diku nga fillimi i gushtit.

Gjykata Ndërkombëtare për krime lufte, ka vendosur që më 25 dhe 26 qershor të këtij viti, të mbahen seancat përmbyllëse të procesit gjyqësor kundër ish kryeministrit të Kosovës Ramush Haradinaj dhe dy ish bashkëluftëtarëve të tij Idriz Balaj dhe Lah Brahimaj.
Ramush Haradinaj është shpallur i pafajshëm në prill të vitit 2008, por Tribunali i Hagës vendosi për një rigjykim të pjesshëm, i cili filloi në korrik të vitit 2010.

Ramush Haradinaj, Idriz Balaj dhe Lah Brahimaj akuzohen për “krime që bien ndesh me ligjet dhe zakonet e luftës”.