Raporti s’i ka burimet në KFOR

Komandanti i KFOR-it, Erhard Buhler, ka mohuar të shtunën se një raport, në bazë të të cilit është publikuar një shkrim i gazetës “Le Monde”, i takon KFOR-it.

Shkrimi, i cili bazohet në një raport të inteligjencës së KFOR-it për vitin 2004, ndërlidh anëtarin e Kryesisë së PDK-së, Xhavit Haliti, me “aktivitete kriminale të pasluftës në Kosovë”.

“Nuk është një raport që i ka burimet nga qarqet e KFOR-it, por është një raport që mund t’i drejtohet KFOR-it apo t’i jepet KFOR-it në dispozicion. Të gjitha këto unë i marr seriozisht dhe e kam krijuar një komision të përbashkët, i cili do të gjejë burimin e këtyre raporteve. Më mirë do të jepja një përgjigje kur t’i përmbyllë hulumtimet ky komision i sapokrijuar”, ka thënë Buhler.

Ai ka theksuar se nuk ka asnjë lloj dëshmie nëse ky raport është i vërtetë dhe se për këtë duhet pritur përfundimin e punës së komisionit, që do të gjejë burimin e raporteve.

Buhler i bëri këto komente në ceremoninë e hapjes së Shtëpisë Fushore në qendër të Prishtinës. Shtëpia Fushore, ose LMT C2 do të ketë 11 ushtarë suedezë, një udhëheqës të ekipit, pesë oficerë ndërlidhës dhe pesë asistentë.