Reforma Zgjedhore, Patozi letër Ruçit: Mazhoranca do miratojë amendamentet e Opozitës, garantojmë miratimin e ligjit në rrugë konsensuale

Kreu i grupit parlamentar demokrat, Astrit Patozi, i ka dërguar një letër kreut të grupit socialist, Gramoz Ruçi, me anë të së cilës e fton që të nisin punën e përbashkët për reformën zgjedhore. Patozi i drejtohet homologut të tij Ruçi, duke i garantuar ekskluzivitetin e opozitës në propozimin e amendamenteve për hartimin e ligjit elektoral si dhe dhënien e konsensusit nga mazhoranca. Apeli i kreut të grupit parlamentar demokrat Patozi, vjen pas reagimit të kryeministrit Berisha vetëm pak ditë më parë, kur i parashtroi ofertën opozitës, për amendimin e ligjit elektoral, sipas propozimeve të Partisë Socialiste dhe aleatëve të saj. Ende s’është e qartë nëse PS do pranojë koncesionin e mazhorancës, por deri në këto momente kreu i grupit parlamentar të socialistëve, Gramoz Ruçi nuk i ka kthyer përgjigje atij të demokratëve Astrit Patozi. Ftesa është dërguar më 13 korrik, ndërsa zhvillimi i takimit të parë ishte menduar për në datën 13 korrikut.
Ftesa është e hapur dhe mbetet e tillë, në rast se kryetari i grupit parlamentar të Partisë Socialiste do të propozonte ndonjë datë tjetër. Megjithëse kanë kaluar 3 ditë ende nuk ka patur ndonjë përgjigje nga z. Ruçi. 

Teksti i plotë i letrës:

“I nderuar zoti Ruçi,

Tani që Zgjedhjet Vendore të 8 majit përfunduan, është koha që të mendojmë dhe të nisim një proces të gjerë bashkëpunimi, në funksion të zgjedhjeve të ardhshme të vitit 2013 dhe të interesit më të mirë të vendit.

Siç të gjithë e dimë, Kodi ynë Zgjedhor është konsensual dhe bashkëkohor, i cili, edhe sipas ekspertizës së OSBE/ODHIR-it, garanton zgjedhje të standardeve demokratike.

Por megjithatë, në raportin përfundimtar për Zgjedhjet e Përgjithshme të vitit 2009, OSBE/ODHIR-i bëri një seri rekomandimesh, të cilat kishin për qëllim përmirësimin e procesit zgjedhor. Ne kemi bindjen që më shumë se gjysma e këtyre rekomandimeve, të cilat nuk kërkonin ndërhyrje në Kodin Zgjedhor, u zgjidhën me vendime dhe masa administrative të KQZ-së dhe institucioneve të tjera.

Po kështu, rekomandimi i parë, i cili është dhe më kryesori, pasi ka të bëjë me vullnetin e forcave politike për zbatimin me korrektesë të ligjit zgjedhor, ishte objekt i shqyrtimit të përbashkët në tryezën e marsit të vitit 2011. Në atë kohë, me propozim të të dy palëve, dhe në prani dhe asistencë të Prezencës së OSBE-së, u përgatit teksti i një marrëveshjeje shumë serioze për zbatimin e këtij rekomandimi, i cili pret shqyrtimin dhe miratimin përfundimtar prej nesh.

Disa rekomandime të raportit të OSBE/ODHIR-it për Zgjedhjet e Vitit 2009, dhe ndoshta edhe rekomandime të reja të raportit përfundimtar të OSBE/ODIHR-it për Zgjedhjet e 8 majit 2011, presin bashkëpunimin tonë për të arritur standarte më të larta në proceset e ardhshme zgjedhore.

Me anë të kësaj letre, dua që, në emër të Grupit Parlamentar të Partisë Demokratike, t’ju ftoj Ju zoti kryetar, që të nisim sa më shpejt punën e përbashkët për reformën zgjedhore, pasi kjo përbën edhe një nga kërkesat më të rëndësishme për avancimin e procesit të integrimit 2011, si dhe një bazë të shëndoshë dhe solide në përgatitjen serioze të Zgjedhjeve të Përgjithshme të vitit 2013 .

Prandaj dhe propozoj që me datë 15 korrik ose në një datë tjetër, që Ju mund të sugjeroni, të takohemi në selinë e Kuvendit të Shqipërisë dhe të nisim bisedimet për të ngritur Komisionin Parlamentar të Reformës Zgjedhore, të cilin do të ishte mirë ta miratonim dhe votonim brenda këtij sesioni.

Propozoj gjithashtu, që bashkëkryetarët e Komisionit Parlamentar të Reformës Zgjedhore, ose ne të dy, si drejtuesit e grupeve parlamentare të mazhorancës dhe opozitës, t’i drejtohemi me një letër OSBE/ODHIR-it dhe Komisionit të Venecias për t’i ftuar që të asistojnë komisionin me ekspertizën e tyre. Asistenca e tyre do të ishte kontribut shumë i cmuar në ndryshimet e mundshme të Kodit Zgjedhor, të nevojshme për adresimin e të gjitha rekomandimeve të raportit të OSBE/ODHIR-it për Zgjedhjet e Përgjithshme të vitit 2009, si dhe rekomandimet e raportit për Zgjedhjet Vendore 2011, që pritet të publikohet së shpejti.

Dua t’Ju siguroj paraprakisht se Grupi Parlamentar i Partisë Demokratike do të votojë, pa asnjë hezitim, të gjitha amendamentet që do të paraqiten prej jush në Komisionin e Reformës Zgjedhore, me kushtin e vetëm që ato të kenë marrë më parë vlerësimin pozitiv të OSBE/ODHIR-it dhe Komisionit të Venecias.

Duke shpresuar sinqerisht në një përgjigje pozitive, më lejoni t’Ju shpreh edhe një herë konsideratën time më të lartë”

Me respekt

Kryetari,

Astrit Patozi