“Reforma Zgjedhore dhe parlamentare do mbyllet në pak ditë”

Kryeparlamentarja Topalli njeh Federalistët e Rinj Evropianë, “JEF”, me veprimtarinë e Kuvendit

Kryetarja e Kuvendit Jozefina Topalli priti në ambientet e Kryesisë së Kuvendit, Federalistët e Rinj Europian “JEF”. Ky aktivitet u organizua në kuadër të Muajit të Evropës që përkon edhe me 100 vjetorin e Pavarësisë së Shqipërisë.
Gjatë fjalës së saj Kryetarja e Kuvendit foli për ndryshimet që Shqipëria ka bërë në 20 vitet e fundit.
Ajo tha se për lirinë duhet të punosh dhe të mendosh çdo ditë, duhet ta ushqesh sepse “Liria funksionon”. “Shqipëria është një rast ekselent. Çdo kush mund të thotë po lira funksionon. Liria bën mrekulli. Në fakt kush e mendonte se vendi ynë mund të bëhej anëtar i  NATO-s dhe se  ne mund të uleshim me të njëjtin dinjitet, mundësi, shans me liderët e botës. Siç jemi ulur në tryezën e NATO-s dhe siç do të ulemi përsëri në Samitin e Çikagos, kush e mendonte se shqiptarët do të lëvizin pa viza”, u shpreh kryetarja e Kuvendit, Jozefina Topalli.
Sipas saj, në Kuvendin e Shqipërisë gjatë kësaj periudhe pas dy viteve të bllokimit dhe të bojkotimit nga opozita pas marrëveshjes së 16 nëntorit  po punohet në të gjitha komisionet parlamentare nga mazhoranca dhe opozita për të kaluar ligje që janë reformat ë cilat kërkojnë 3/5 e votave. “Ishte e pamundur të votonim përpara për shkak se opozita bllokonte votën”, tha Topalli.
Gjatë fjalës së saj Topalli tha se aktualisht është optimiste për integrimin e vendit pasi një numër i madh i ligjeve me 3/5 janë miratuar dhe se beson se shumë shpejt do të realizohet edhe Reforma Zgjedhore. “Unë jam optimiste që edhe Reforma Zgjedhore do të finalizohet shumë shpejt. Reforma Parlamentare të mbyllet në pak ditë. Asgjë nuk kemi marrë dhuratë në historinë tonë. Për meritë, do të bëjmë një hap tjetër, do të hapim një stacion tjetër në historinë tonë drejt BE-së”, u shpreh Kryetarja e Kuvendit.
Nga ana tjetër, Federalistët e Rinj Evropianë deklaruan se puna e Kuvendit është gurë themeli për integrimin evropian të Shqipërisë. Ata u shprehen se Shqipëria ka bërë hapa të dukshëm në axhendën europiane dhe se shpresojnë që këtë vjeshtë vendi ynë të marrë statusin e vendit kandidat ndërkohë që rinia do të luajë rolin e saj në këtë proces.
Kryetarja e Kuvendit pasi i falënderoi përzemërsisht të rinj për organizimin e këtij aktiviteti dhe shprehu gatishmërinë që Kuvendi i Shqipërisë do t’i ketë gjithmonë dyert e hapura për të tilla aktivitete.