Rekordi, bluza e Kaka shitet 15500 euro
Jetmir Halilaj
Tifozët shqiptarë të Milanit janë gati të bëjnë “çmenduri” për idhujt e tyre kuqezinj. Në ankandin e zhvilluar pas ndeshjes Shqipëri-Milan 3-3, në hotel “Sheraton”, disa fansa të skuadrës kuqezi, kanë derdhur shuma të mëdha parash për të blerë fanellat e futbollistëve të preferuar. Fanellat më të shtrenjta të blera nga tifozët shqiptarë ishin ato të yjeve Kaka dhe Bekham, për të cilat një ultras i Milanit ka ofruar në total 23500 euro. Tifozi Arjan Vangjeli ka ofruar 15500 euro për fanellën e Kakasë dhe tetë mijë euro për fanellën e mesfushorit anglez. Nuk ka munguar interesimi edhe për yjet e tjerë të Milanit, pasi fanella e Maldinit është shitur gjithashtu për një shumë të majme. Tifozi Artur Balla e ka blerë bluzën e kapitenit legjendar të Milanit për shumën e 5500 eurove. Fanella e Ronaldinjos është blera nga Irgen Selfo për 3800 euro, ndërsa bluza e Patos është blerë nga Gramoz Taçi 2400 euro. Ndërkaq, nuk mund të mos ishte protagonist në këtë ankand edhe babai i Rezart Taçit, Mustafai, i cili ka blerë fanellën e Shevçenkos për 1700 euro.
Të ardhurat
Ankandi i zhvilluar të shtunën në mbrëmje nga kompania “Taçi Oil” me fanellat e futbollistëve të Milanit kishte qëllime bamirësie. Të gjitha të ardhurat nga ky eveniment do të shkojnë në ndihmë të fëmijëve në nevojë. Nga shitja e fanellave të 21 futbollistëve të Milanit, të nënshkruara përkatësisht me autografet e tyre, janë grumbulluar të mërkurën rreth 64950 mijë euro.
Mbrëmja
Menjëherë pas ankandit është shtruar një darkë gala për nder të përfaqësuesve të Milanit, ku të pranishëm kanë qenë edhe trajneri i kuqezinjve, Karlo Ançeloti dhe përgjegjësi i marrëdhënieve me jashtë, Daniele Masaro. Burime konfidenciale pranë kompanisë “Taçi Oil”, kanë bërë të ditur se gjithçka ka shkuar në mënyrë perfekte, madje dy përfaqësuesit e Milanit, janë argëtuar edhe me tingujt e muzikës shqiptare. Organizatorët e kësaj ndeshjeje, “Taçi Oil”, kishin ftuar në mbrëmje një grup këngëtarësh vendës, të cilët kanë ndezur atmosferën edhe në mbrëmje. Klubi i madh, “AC Milan”, do të jetë pjesëmarrës në disa aktivitete të parashikuara në fundin e kësaj jave. Sipas asaj që tregoi zëvendëspresidenti Adriano Galiani, më 17 ose 18 maj, në sheshin “Nënë Tereza”, klubi kuqezi do të sjellë parkun e Milanit, çka do t’u mundësojë argëtim fëmijëve të kryeqytetit. Gjithçka do të jetë falas për ta, ndërkohë që u konfirmua gjithashtu se nga 6 qershori, do të nisë edhe “Milan Junior Camp”. Plot 350 fëmijë do të jenë në këtë aktivitet sportiv.
Shitjet
Lojtari Emër Mbiemër Shuma në euro
Kalac Yllka Beja 750 EUR
Zambrota Ledia Dervishi 1050 EUR
Gatuzo Elona Hasanmata 3300 EUR
Jankulovski Merita Gurabardhi 1000 EUR
Tiago Silva Arjan Vangjeli 2100 EUR
Senderos Irgen Selfo 3100 EUR
Mationi Vasil Dede 1200 EUR
Flamini Malika Galiani 1300 EUR
Bertuçi Gentian Prifti 400 EUR
Darmian Malika Galiani 400 EUR
Pirlo Berardino Apiçela 2800 EUR
Borrielo Anika Taçi 1100 EUR
Shevçenko Mustafa Taçi 1700 EUR
Sedorf Gentian prifti 1700 EUR
Pato Gramoz Taçi 2400 EUR
Inzagi Mariglen Bundo 3000 EUR
Ronaldinho Irgen Selfo 3800 EUR
Kaka’ Arjan Vangjeli 15500 EUR
Maldini Artur Balla 5500 EUR
Bekham Arjan Vangjeli 8000 EUR
Antonini Malika Galiani 1300 EUR