Rikthimi i Bunjakut
Albert Bunjaku po jep shenja pozitive pas rikthimit nga lëndimi, i cili e la jashtë fushe për një kohë të gjatë. Sulmuesi kosovar ka shënuar dy gola për Nurnbergun në ndeshjen miqësore kundër SV Raika (6:0).
Kosovari me pasaportë zvicerane nuk e kishte të lehtë t’i rikthehej fushës pas lëndimit që kishte pësuar në gju. “E kam pasur vështirë ta gjej durimin e nevojshëm”, ka thënë Bunjaku për mediat gjermane.
Ish sulmuesi i RW Erfurtit kishte emocione të përziera sezonin e kaluar. Nga ftesa për pjesëmarrje në kampionat botëror ‘Afrika e Jugut 2010’, papritmas pësoi lëndim të rëndë që e la jashtë fushës për një kohë të gjatë.
“Për shumë atletë profesionistë ky lëndim do të ishte fundi i karrierës. E kam pasur me të vërtetë vështirë, por ia kam dalë mbanë”, theksoi Bunjaku.
Reprezentuesi i Zvicrës thotë se edhe kur mjekët nuk ishin optimistë, nuk ishte brengosur për vazhdimin e karrierës se tij. “Gjithmonë kam besuar në rikthimin tim”, ka përfunduar gjilanasi, i cili shkëlqeu para dy sezoneve në Bundesliga duke realizuar 12 gola.
Hecking: Bunjaku nuk duhet të frikohet nga duelet
Dy golat e Albert Bunjkaut e kanë gëzuar edhe trajnerin e klubit nga Bundesliga, Dieter Hecking. “Është e rëndësishme që Alberti ta humbë frikën nga duelet. Atëherë ai do të jetë në gjendje që të na ndihmojë”, ka thënë Hecking për mediat gjermane.