Rinovohet Dispanseri në Ferizaj

Kanë filluar punimet në renovimin e objektit të qendrës mjekësore numër një, e cila njihet ndryshe si Dispanseri. Në hapje të punimeve është thënë se ky projekt synon që pacientëve t’u ofrojë kushte më të mira për trajtim.

Ardian Ferizi, drejtor i Drejtorisë për Planifikim dhe Zhvillim, ka thënë se renovimi nënkupton rimodelimin e përdheses dhe riinstalimin e të gjithë sistemeve të ujit, rrymës e kanalizimit.

Bashkim Hyseni, drejtor i Drejtorisë për Shëndetësi dhe Mirëqenie Sociale, vlerësoi se kjo nismë ishte me vite e nevojshme. “Është një objekt shumë i rëndësishëm që mbulon një hapësirë mjaft të gjerë. Kishte nevojë shumë për një renovim të brendshëm, pasi që kishte telashe vazhdimisht me kulm”.

Deri në kryerje të punimeve, i tërë stafi i qendrës do të vendoset në qendrën numër dy, si dhe në Qendrën Kryesore të Mjekësisë Familjare. Qytetarët e kësaj zone shërbimet mund t’i kryejnë në këto qendra. Projekti do të kushtojë rreth 104 mijë euro, ndërsa punët do të zgjasin rreth 40 ditë pune.