Ristani fut ne sherr deputetet ne Komisionin e Ligjeve Rozeta Rapushi

Mungesa e kryetarit te Komisionit Qendror te Zgjedhjeve, Arben Ristani, ne mbledhjen e djeshme te Komisionit te Ligjeve, ku diskutohej raporti vjetor i ketij institucioni, shkaktoi debate te ashpra mes deputeteve te majte e te djathte. Deputetet socialiste, te cilet kishin perveshur menget per t'i kerkuar jo pak sqarime Ristanit mbi punen e KQZ-se per vitin e kaluar, mes te cileve dhe zgjedhjet e 8 majit u zhgenjyen kur per te prezantuar raportin u paraqit Sekretarja e Pergjithshme e ketij institucioni, Eljona Mancaku. "Dua te denoncoj mbledhjen e komisionit, nje mbledhje qesharake, ofenduese per parlamentaret shqiptare, ku pritej te raportonte kryetari i KQZ, dhe ne menyre krejt te papergjegjshme dhe ne kundershtim me cdo lloj praktike te ketij komisioni kryetari i KQZ nuk vjen te raportoje ne komision, duke e bere te pavlere te gjithe kete seance. Fatkeqesisht, KQZ ka qene pika nevralgjike e krizes aq me teper qe jemi dhe ne procesin e reformes zgjedhore", - u shpreh deputeti socialist Damian Gjiknuri. Por ne replike me te, kryetari i komisionit, Ilir Rusmali, i beri te qarte se raporti vjetor i KQZ-se nuk eshte raport zgjedhjesh, po raport i veprimtarise se institucionit. "Sekretari i Pergjithshem e perfaqeson me se miri institucionin. Nese do te besh sherrxhiun ne kete komision, perpiqu te mbash veten dhe te rilexosh rregulloren. Sepse rregullorja nuk lejon sherrxhinjte te jene pjese ne punimet e Kuvendit, rregullorja i urren sherrxhinjte. Sa e rrepte kunder sherrxhinjve dhe ojnave eshte kjo rregullore, me e rrepta ne Europe", - replikoi Rusmali. Sipas tij, per punen administrative te KQZ-se, u mor nje vendim konsensual i kryesise se Komisionit te Ligjeve, ku perfshihet edhe nenkryetari socialist Fatmir Xhafaj, i cili mungoi gjate raportimit te KQZ-se ne Komisionin e Ligjeve. "Une sapo kontaktova me nenkryetarin e Komisionit te Ligjeve, nuk ma konfirmon te njejten gje, ne lidhje me audiencen. Eshte shqetesuese dhe e pafalshme qe nje institucion kaq i rendesishem, te mos perfaqesohet ketu nga kryetari", - vijoi replikat Gjiknuri. Por debatet nuk perfunduan ketu. "Nese keni ndonje shqetesim me vendimet qe merr Kryesia e Komisionit, hap rregulloren, lexo procedurat, ndiq rrugen ligjore dhe ankohu, por ketu te devijojme debatin, nga lenda qe kemi tek marredheniet tuaja me Fatmir Xhafen, nuk e bej dot", - u kunderpergjigj Rusmali. "Dua te denoncoj veprimet e ketij Komisioni, kryetarit te tij, i cili ne menyre krejt te papranueshme e sabotoi kete seance, duke mos nxjerre perpara pergjegjesise te Kuvendit dhe te publikut te gjitha ato veprime qe ka kryer KQZ-ja dhe aq shume te kritikuara nga nderkombetaret. Me vjen keq qe po te njejtet njerez qe e kane frymezuar "Ristanokracine" vazhdojne akoma te kerkojne ta mbrojne ate", - vijoi debatin pas mbledhjes Gjiknuri.

Raportimi pa pyetje i KQZ

Ne mungese te kryetarit te Komisionit Qendror te Zgjedhjeve, Sekretarja e Pergjithshme e ketij institucioni, Eljona Mancaku, prezantoi ne pak minuta punen e ketij institucioni per vitin e kaluar. Por ne mbyllje te raportimit te shkurter, ndryshe nga heret e tjera, asnje nga deputetet nuk i drejtoi pyetje per veprimtarine e KQZ-se, Mancakut, pavaresisht faktit se vitin e kaluar u zhvilluan zgjedhje, qe paten jo pak kritika nga opozita. Debati i djeshem ne mbledhjen e komisionit te ligjeve, lindi ne nje moment kur KQZ-ja eshte ceshtja me e nxehte e Reformes Zgjedhore, e cila, sipas mandatit te dhene nga Kuvendi, duhet te perfundoje kete te enjte.