Rrëshqitja e tokës dëmton 80 hektarë tokë me të mbjella në Berat

Në të gjithë territorin e komunës Cukalat, ditët e fundit ka pasur rrëshqitje të tokave bujqësore në disa fshatra si Cukalat, Çetë, Donofrosë, Selanicë, Krotinë, Allambres, ku një sipërfaqe prej 80 hektarësh tokë me të mbjella të stinës është dëmtuar. Sipas kryetarit të komunës, dëmtime të rënda ka pasur në rrugët kryesore që lidhin qendrën e komunës

Cukalat me fshatrat Krotinë, Allambrezë, Çetë, rrugë të cilat janë dëmtuar dhe kanë dalë jashtë funksionimit. Shkarjet e tokave në këtë komunë kanë përfshirë 10 banesa, 5 prej të cilave janë dëmtuar krejtësisht ndërsa familjarët e tyre janë strehuar në çadra. Pesë familje janë duke kaluar ditët e fundit nëpër çadra, pasi banesat e tyre janë shembur krejtësisht. Muharem Dushku dhe bashkëshortja e tij janë një prej familjeve që tashmë është strehuar në çadër, pasi banesat e tyre është shembur krejtësisht. Ata janë shprehur se shembja e banesës u ka marrë me vete gjithçka dhe tashmë kërkojnë ndihmë nga shteti. Dëmtime ka pësuar dhe godina e komunës Cukalat. Komuna Cukalat ka mbyllur dje dyert e saj, pasi është rrënuar si pasojë e shkarjeve të tokës dhe rrezikon shembjen totale. Prej disa javësh, godina kishte pësuar çarje të mureve, por situata mëngjesin e djeshëm është paraqitur dhe më e vështirë. Çarjet kanë përfshirë gjithë zyrat e godinës, e cila tashmë ka dalë jashtë funksionit. Mëngjesin e djeshëm kur punonjësit janë paraqitur në punë kanë parë se muret janë ndarë si pasojë e çarjeve dhe disa nga zyrat nuk kanë mundur të hapen duke u bllokuar nga rrënimi i tavanit. Situata ka alarmuar punonjësit, të cilët e kanë pasur të pamundur të punojnë në godinën që rrezikon të shembet nga çasti në çast. Kryetari i komunës Justi Zyka bëri të ditur dje se ambientet e komunës nuk janë më të përshtatshme për kryerjen e aktivitetit të saj. Sipas Zykës, punonjësit ndihen të rrezikuar në ambientet ku nuk garantohet jeta, pasi godina rrezikon të bjerë nga momenti në moment. Kryekomunari pohon se gjithë situatën e ka raportuar në Ministrinë e Brendshme, pranë Drejtorisë së Përgjithshme të Emergjencave Tiranë, Prefekturës së Qarkut Berat dhe Këshillit të Qarkut. Por pritet që të aprovohet një fond për ndërtimin e një godine të re, pasi sipas specialistëve, ajo aktuale nuk mund të rikonstruktohet më. Për mos paralizuar aktivitetin e komunës, është menduar që punonjësit e komunës të vendosen në një godinë me qera në fshat, ose në disa prej klasave të shkollës 9 vjeçare.

A. Shehu