Rusia bie dakord të tërheqë trupat nga një zonë rreth Osetisë Jugore

Rusia ra dakord të tërheqë të gjitha trupat nga një zonë neutrale rreth Osetisë Jugore, territor separatist i Gjeorgjisë.

Presidenti rus, Dmitri Medvedev e njoftoi marrëveshjen në një konferencë të përbashkët për shtyp me Presidentin e Francës Nikola Sarkozi. Zoti Medvedev tha se tërheqja do të fillojë sapo të kenë arritur paqeruajtësit ndërkombëtarë.      

Presidenti Sarkozi u tha gazetarëve se të gjitha forcat ruse do të jenë larguar nga Gjeorgjia brenda një muaji.

Zoti Sarkozi, vendi i të cilit mban kryesinë e radhës të Bashkimit Europian, ishte hartuesi i marrëveshjes së armëpushimit mes Gjeorgjisë dhe Rusisë muajin e kaluar.

Rusia ngul këmbë se trupat e saj që kanë mbetur brenda dhe pranë territoreve separatiste gjeorgjiane të Osetisë Jugore dhe Abkazisë funksionojnë si paqeruajtës që po respektojnë kushtet e armëpushimit. Por Gjeorgjia e akuzon Rusinë se po e shkel armëpushimin duke vendosur trupa shtesë në disa prej pikëkalimeve të rëndësishme brenda territorit gjeorgjian. //kk//