Rusia dërgon anije lufte kundër piratëve somalezë

Moskë (start)-Rusia do të dërgojë anije të tjera lufte për të patrulluar në ujërat e Somalisë për të luftuar piraterinë, bëri të ditur komandanti i marinës ruse. Admirali Vladimir Vyssotski, cituar nga agjencia e lajmeve Ria Novosti tha se pas anijes Intrepide, anije të tjera të marinës ruse do të nisen drejt rajonit të Somalisë.

''Kjo është e nevojshme për shkak të situatës që po zhvillohet në afërsi të Bririt të Afrikës dhe në Gjirin Aden ku piratët somalezë kanë shtuar operacionet e tyre kundër anijeve'', shtoi Vyssotski. Sipas shifrave të Zyrës Bregdetare Ndërkombëtare, këtë vit janë sulmuar 94 anije nga piratët somalezë në Oqeanin Indian dhe në Gjirin Aden.