SHBA – Trump dhe Putin bien dakord të kërkojnë ndalimin 30-ditor të sulmeve në objektet energjetike Rusi-Ukrainë

UASHINGTON, 18 mars /ATSH/- Presidenti rus, Vladimir Putin dhe presidenti amerikan, Donald Trump ranë dakord sot për të kërkuar një armëpushim të kufizuar 30-ditor kundër objektivave të energjisë dhe infrastrukturës në Ukrainë, ndërsa bisedimet që synojnë avancimin drejt një plani më të gjerë paqeje do të fillojnë “menjëherë”, tha Shtëpia e Bardhë, sipas “Reuters”.

Putini nuk pranoi një armëpushim më të gjerë 30-ditor të mbështetur nga SHBA-ja, të cilin Ukraina ka thënë se është gati ta pranojë.

“Presidenti rus ngriti “pika të rëndësishme” në lidhje me parandalimin e përdorimit të një armëpushimi të tillë nga Ukraina për të mobilizuar më shumë ushtarë dhe për të riarmatosur veten”, tha Kremlini në një deklaratë pas bisedës telefonike midis dy liderëve.

Putini theksoi gjithashtu se ndërprerja e plotë e ndihmës ushtarake të huaj dhe ofrimi i informacionit të inteligjencës për Kievin ishte  një kusht për çdo marrëveshje të përhershme paqeje.

Në një deklaratë, Shtëpia e Bardhë tha se negociatat për një armëpushim detar në Detin e Zi, si dhe zona të tjera të mundshme do të fillojnë menjëherë në Lindjen e Mesme.

“Udhëheqësit ranë dakord që lëvizja drejt paqes do të fillonte me një armëpushim në objektivat e energjisë dhe infrastrukturës, si dhe negociata teknike për zbatimin e një armëpushimi detar në Detin e Zi, armëpushim të plotë dhe paqe të përhershme”, thuhet në deklaratën e Shtëpisë së Bardhë.

Trump është përpjekur të bindë Putinin për te pranuar armëpushimin 30-ditor që ai shpreson se do të shkonte një hap më afër përfundimit të konfliktit më të madh të Evropës që nga Lufta e Dytë Botërore.

Lufta ka vrarë ose plagosur qindra mijëra njerëz, ka zhvendosur miliona dhe ka bërë qytete të tëra në rrënoja.

Trump ka lënë të kuptohet se një marrëveshje e përhershme e paqes mund të përfshijë lëshime territoriale nga Kievi dhe kontrollin e centralit bërthamor të Zaporizhias në Ukrainë.

Ukraina dhe aleatët e saj perëndimorë e kanë përshkruar prej kohësh pushtimin rus të Ukrainës si një grabitje toke imperialiste dhe presidenti ukrainas Volodymyr Zelensky ka akuzuar Putinin për zgjatjen e qëllimshme të luftës.

Zelensky, i cili mbërriti sot në Finlandë për të diskutuar mbështetjen e vendit për Ukrainën, tha se sovraniteti i Ukrainës nuk ishte i negociueshëm dhe se Rusia duhej të dorëzonte territorin që kishte kapur.

Presidentja e Komisionit Evropian Ursula von der Leyen paralajmëroi sot se Rusia kishte zgjeruar masivisht kapacitetin e saj të prodhimit ushtarak-industrial në përgatitje për konfrontimin e ardhshëm me demokracitë evropiane.

Rusia pushtoi gadishullin e Krimesë nga Ukraina në vitin 2014 dhe shumicën e katër rajoneve lindore të Ukrainës pas pushtimit të saj në shkurt 2022. Gjithsesi, ajo kontrollon rreth një të pestën e territorit ukrainas.

Putini i ka kërkuar Ukrainës të heqë dorë nga çdo ambicie për t’u bashkuar me aleancën ushtarake perëndimore.

Presidenti rus tha gjithashtu se Rusia duhej të mbante kontrollin e territorit ukrainas që kishte kapur, sanksionet perëndimore duhej të lehtësoheshin dhe Kievi duhej të organizonte zgjedhje presidenciale.

Zelensky, i zgjedhur në vitin 2019, ka mbetur në detyrë sipas ligjit ushtarak që ai vendosi për shkak të luftës. //a.i/