SHBA – Uashingtoni pezullon një pjesë të sanksioneve ndaj gjigantit rus të naftës ”Lukoil”

UASHINGTON, 4 dhjetor /ATSH-AFP/ – Qeveria amerikane njoftoi sot se po pezullon një pjesë të sanksioneve të saj kundër gjigantit rus të naftës ”Lukoil” për të lejuar stacionet e benzinës të vendosura jashtë Rusisë të vazhdojnë të operojnë.

”Transaksionet që përfshijnë këto stacione benzine lejohen për të shmangur penalizimin e klientëve dhe furnizuesve të tyre, me kusht që të ardhurat të mos transferohen në Rusi”, sipas një deklarate nga Departamenti i Thesarit i SHBA-së.

Heqja dorë është në fuqi deri më 29 prill 2026.

Në fund të tetorit, për të ushtruar presion mbi Rusinë, e cila është në luftë me Ukrainën, Shtetet e Bashkuara shtuan dy prodhuesit më të mëdhenj të naftës në Rusi, ”Lukoil” dhe ”Rosneft”, në listën e saj të subjekteve të sanksionuara, një listë e monitoruar nga shumë vende dhe e frikësuar në botën e biznesit.

Kompanitë që punojnë me subjekte ruse rrezikojnë sanksione dytësore që do t’i pengonin ato të hynin në bankat, tregtarët, transportuesit dhe siguruesit amerikanë – shtylla kurrizore e tregut të mallrave.

Njoftimi i Thesarit të SHBA-së vjen dy ditë pas një takimi në Moskë midis presidentit rus, Vladimir Putin dhe të dërguarit të Donald Trump, Steve Witkoff.

Qeveria e SHBA-së po përpiqet të negociojë përfundimin e luftës në Ukrainë, por aleatët e saj evropianë e akuzojnë atë se favorizon kërkesat ruse./ a.jor.