SOFJE – NATO: Anëtarët duhet të lejojnë Ukrainën të përdorë armë perëndimore në Rusi

SOFJE, 27 maj /ATSH-DPA/ – NATO u ka bërë thirrje sot vendeve anëtare të autorizojnë Ukrainën të përdorë armët perëndimore kundër objektivave ushtarake në Rusi gjatë një takimi në kryeqytetin bullgar, Sofje.

Asambleja Parlamentare e NATO-s (PA) miratoi një deklaratë përkatëse duke premtuar mbështetjen e Ukrainës deri në arritjen e fitores.

“Ka ardhur koha për të hequr disa kufizime në përdorimin e armëve të ofruara”, tha sekretari i përgjithshëm i NATO-s, Jens Stoltenberg.

Stoltenberg përmendi rajonin ukrainas, Kharkivin, ku vija e parë dhe kufiri me Rusinë pak a shumë përkonin, si një shembull të një përdorimi të mundshëm të armëve perëndimore.

“Ukraina do të ishte më e dobët nëse anëtarët e NATO-s do të vazhdonin ta mbështesnin atë vetëm deri në gjysmë të rrugës”, paralajmëroi presidenti i Asamblesë Parlamentare të NATO-s, Michał Szczerba nga Polonia.

Ministri ukrainas i Mbrojtjes, Rustem Umerov u bëri thirrje aleatëve përmes një video-mesazhi që të mbyllin hapësirën ajrore mbi Ukrainën perëndimore me sistemet e tyre të mbrojtjes ajrore.

Umerov tha se vendi i tij po përpiqej për anëtarësimin e plotë në NATO.

Në takimin pranveror të PA-së morën pjesë deputetë nga vendet anëtare të NATO-s dhe shtetet partnere. Në Sofje ka udhëtuar edhe një delegacion nga Bundestagu gjerman.

Stoltenberg përmendi tre tema të cilat do të diskutohen në samitin e ardhshëm të NATO-s në Uashington në korrik; përmirësimi i pajisjeve mbrojtëse të vendeve anëtare, mbështetja për Ukrainën dhe partneriteti global me fokus në rajonin Azi-Paqësor.

Asambleja Parlamentare bëri thirrje gjithashtu për krijimin e një qendre në selinë e NATO-s në Bruksel për të luftuar dezinformimin. //a.i/