Sannino: Kemi dëshirë ta shohim Kosovën sa më afër BE-së

Zëvendës drejtori i Komisionit Evropian për Zgjerim, Stefano Sannino, ka thënë të enjten në veri të Mitrovicës se rajoni i Ballkanit Perëndimor është në rrugë të mirë sa i përket integrimit drejt BE-së, në të cilën duhet përfshirë edhe shteti i Kosovës.

“Do të kishim dëshirë të shohim Kosovën sa më afër BE-së dhe jemi të gatshëm të ndihmojmë në këtë drejtim. Qëllimi i vizitës time sot këtu është të gjejmë mënyrën si të përmirësojmë procesin e integrimit të shteteve të Ballkanit në Bashkësinë Evropiane, duke përfshirë këtu edhe Kosovën”, tha Sannino.

Ai ka vizituar edhe shtëpinë e BE-së, me ç’rast është takuar me përfaqësuesin e BE-së për veriun, Mikele Gifoni, zëvendës shefin e EULEX-it, Endi Sparks, dhe shefin e Zyrës ndërlidhëse të Komisionit Evropian, Renzo Davidi.

Gifoni është shprehur se përfaqësuesit e BE-së po tentojnë të ngritin kredibilitetin në Kosovë, si qëllim të përbashkët të të gjitha komponentëve të KE-së dhe EULEX-it, në lidhje me integrimin e Kosovës në BE.

Në anën tjetër, Sparks potencoi se njëra nga standardet kryesore evropiane është sundimi i ligjit me të cilën çështje, siç tha ai, duhet të merren Prishtina dhe Beogradi gjatë bisedimeve.

Shefi i Zyrës ndërlidhëse të Komisionit Evropian, Renzo Davidi, i cili më parë qëndroi në Beograd, do të qëndrojë këtu deri në fund të javës me ç’rast do të takohet me përfaqësues të ndryshëm lokal dhe ndërkombëtar.