Sarkozi: Po humba zgjedhjet, do ta lë politikën

Presidenti francez, Nikolas Sarkozi, deklaroi të enjten se do ta braktisë politikën nëse humbet zgjedhjet e ardhshme presidenciale të vendit, të cilat mbahen më 22 prill dhe 6 maj. Nuk dua ta fus veten në atë perspektivë, por nëse ndodh humbja, do të merrem me diçka tjetër, tha Sarkozi. Sondazhet tregojnë se humbja e presidentit aktual të Francës është e sigurt, pasi kandidati socialist Fransua Holande ka një përparësi të ndjeshme. Nuk është hera e parë që Sarkozi premton tërheqjen nga politika në rast humbjeje. Në janar ai tha: Jam 56-vjeçar, me politikë merrem prej 35 vjetësh, kam profesionin tim (avokat), kështu që do ta ndryshoj krejtësisht jetën. Nëse humb, nuk do të dëgjoni më asgjë për mua.