Scholz: Shmangia e konfrontimit të drejtpërdrejtë ushtarak me Rusinë duhet të jetë prioriteti kryesor i NATO-s
Në një intervistë me “Der Spiegel” të Gjermanisë, kur iu kërkua të komentonte pse Gjermania nuk i ka dorëzuar Ukrainës armë të rënda Kancelari gjerman Olaf Scholz tha se NATO duhet të shmangë një konfrontim të drejtpërdrejtë ushtarak me Rusinë që mund të çojë në një luftë të tretë botërore, raporton CNN.
“Nuk ka asnjë libër rregullash për këtë situatë që thotë se në cilën pikë ne konsiderohemi palë në luftën në Ukrainë. Kjo është arsyeja pse është edhe më e rëndësishme që ne të shqyrtojmë çdo hap me shumë kujdes dhe të koordinohemi ngushtë me njëri-tjetrin. Nuk duhet të ketë luftë bërthamore. Kjo është arsyeja pse unë nuk përqendrohem në sondazhe ose nuk e lë veten të irritohem nga thirrjet e mprehta. Pasojat e një gabimi do të ishin dramatike“, tha Scholz.
Scholz tha se qëllimi më i rëndësishëm në situatën aktuale është një armëpushim dhe se trupat ruse duhet të tërhiqen.
“Duhet të ketë një marrëveshje paqeje që i mundëson Ukrainës të mbrohet në të ardhmen,” tha ai.
Scholz tha gjithashtu se ai nuk beson se një embargo ndaj gazit rus do t’i jepte fund luftës në Ukrainë.
“Unë absolutisht nuk e kuptoj se si një embargo gazi do t’i jepte fund luftës. Nëse Presidenti rus Vladimir Putin do të ishte i hapur ndaj argumenteve ekonomike, ai kurrë nuk do ta kishte filluar këtë luftë të çmendur. Së dyti, ju silleni sikur kjo të kishte të bënte me paratë. Por ka të bëjë me shmangien e një krize dramatike ekonomike dhe humbjen e miliona vendeve të punës dhe fabrikave që nuk do të hapnin më kurrë dyert e tyre,” tha ai.
Scholz po përballet me kritika në rritje nga brenda dhe jashtë Gjermanisë për ngurrimin e pretenduar të qeverisë së tij për të dorëzuar armë të rënda, si tanke dhe obus, në Ukrainë, ndërsa pushtimi i Rusisë ka hyrë në një fazë të re dhe potencialisht vendimtare.
/rtsh.al/