Sequi përshëndet miratimin e kodit penal: Të mbahet ritmi

Ambasadori i Bashkimit Europian, i akredituar në Tiranë, Ettore Sequi ka përshëndetur votimin e kodit penal nga forcat politike gjatë seancës plenare të së enjtes.Duke iu përgjigjur interesit të disa mediave për vlerësimin nga ana e tij për miratimin e ndryshimeve në Kodin Penal, Ambasadori Ettore Sequi u shpreh:
 

"E mirëpres miratimin nga Kuvendi të ndryshimeve në Kodin Penal ditën e djeshme.
Miratimi i këtyre ndryshimeve është i rëndësishëm sepse ka të bëjë me një nga prioritetet kyçe të Opinionit të Komisionit Evropian për Shqipërinë përsa i përket miratimit të legjislacionit që kërkon një shumicë të cilësuar në Parlament; së dyti, ndryshimet në Kodin Penal janë shumë kuptimplotë sepse kanë të bëjnë me disa çështje të rëndësishme, si për shembull, dekriminalizimi i shpifjes dhe fyerjes, shkeljet që kanë të bëjnë me zgjedhjet, masat kundër dhunës brenda familjes”shprehet ai.
 

Më tej Sequi shpreh besimin se i njëjti ritëm do ti karakterizojë edhe prioritetet e tjera të axhendës europiane.
 

“Miratimi i këtyre ndryshimeve ligjore është një sinjal inkurajues në trajtimin e çështjeve që janë pjesë e axhendës evropiane të vendit. Kam besim se çështje të tjera po kaq të rëndësishme të axhendës evropiane dhe të prioriteteve kyçe të Opinionit do të trajtohen në të njëjtën frymë".