Shala: Do të jemi në Qeveri

Nënkryetari i AAK’së, Blerim Shala i ka uruar qytetarët e Kosovës për lirimin e Ramush Haradinajt nga Haga dhe ka paralajmëruar ndryshime të mëdha në politikën e Kosovës me kthimin e Liderit të AAK’së në Kosovë.

Por, Shala ka thënë se qëndrimi i AAK’së nuk do të ndryshoj ndaj Qeverisë së Kosovës, por se partia e katërt në Kosovë do të vazhdoj të mbështes Ekzekutivin, shkruan Express.

Ky zyrtar i AAK’së ka thënë se Partia e Ramush Haradinajt nuk do të rri si spektatorë në skenën politike të Kosovës.

“Aleanca nuk e ka ndërmend të rri nëse ka mundësi që të aktivizohet në Qeveri, në pushtetin ekzekutiv, ne do ta bëjmë. Sepse ne mendojmë që vendi i duhet një ndryshim i madh”, ka deklaruar Shala.

Nënkryetari Shala ka treguar se të gjitha organizimet për kthimin e Haradinajt janë duke u organizuar nën partonatin e Kryeministrit Hashim Thaçi

“Ramush Haradinaj do të ketë vullnet të takohet me të gjithë liderët e vendit”, ka thënë ai.

Ai e ka lënë të hapur mundësinë që AAK të përfshihet në Qeveri, me ose pa postin e kryeministrit, por e ka përjashtuar mundësinë për zgjedhje të reja pa u kryer reforma zgjedhore.

“Zgjedhje të reja nuk mund të ketë pa bërë reforma për Ligjin për Zgjedhje”, ka thënë ai./Indeksonline/