Shërbimet e nënshkrimit elektronik dhe fiskalizimit me tarifa të reja
Qeveria përcakton masën e tarifave të AKSHI-t. Për shërbimet e nënshkrimit elektronik dhe fiskalizimit tarifa do të jetë zero lek për Administratën Publike, 4800 lekë për bizneset dhe 2000 lekë për qytetarët për nënshkrimin elektronik. Pagesa do të bëhet on-line në ‘e-Albania’.
Këshilli i Ministrave ka miratuar një vendim të ri që përcakton llojet dhe masën e tarifave për shërbimet elektronike të ofruara nga Agjencia Kombëtare e Shoqërisë së Informacionit (AKSHI). Ky vendim shfuqizon tarifat e mëparshme dhe sjell një strukturë të re çmimesh, të diferencuara sipas kategorisë së përdoruesit.
Shërbimet që do të ofrohen kundrejt tarifave përfshijnë nënshkrimin elektronik, vulën elektronike, certifikatën për fiskalizim dhe transaksionet në Platformën Qeveritare të Ndërveprimit (GG).
Tarifat sipas kategorive kryesore
Vendimi i ri përcakton tarifat, me TVSH-në të përfshirë, si vijon:
- Administrata Publike Nënshkrimi, Vula, Fiskalizimi, Transaksioni GG Zero (0) Falas
- Subjektet Private (Bizneset) Nënshkrimi Elektronik 4 800 1 vit vlefshmëri
- Certifikata Fiskalizimi 4 000 1 vit vlefshmëri
- Vula Elektronike / Transaksion GG 20 / 15 Pagesë mujore (për transaksion)
- Shtetasit Shqiptarë dhe të Huaj Nënshkrimi Elektronik 2 000 1 vit vlefshmëri
Për nëpunësit e institucioneve publike me vetëfinancim, shërbimi i nënshkrimit elektronik do të ketë të njëjtën tarifë me subjektet private, pra 4 800 lekë.
Mënyra e pagesës
Vendimi sqaron se pagesa e këtyre tarifave do të kryhet në momentin e aplikimit on-line për kryerjen e veprimeve, nëpërmjet pagesës elektronike në portalin qeveritar “e-Albania”.
Ndërsa tarifat vjetore (si nënshkrimi elektronik dhe certifikata e fiskalizimit) paguhen në marrje të shërbimit, pagesat për vula dhe transaksione në Platformën GG do të realizohen periodikisht çdo muaj, në bazë të numrit të transaksioneve të kryera. Të gjitha të ardhurat e realizuara nga këto tarifa do të derdhen 100% në buxhetin e shtetit.
/rtsh.al/