“Shitesi” i paketave, sekser prane ambasades Greke Klodiana Kotorri

Antikrimi ekonomik-financiar organizoi nje operacion te koduar “Sekseri”, i cili u finalizua me arrestimin e nje 54-vjecari, te akuzuar per falsifikim dokumentesh qe nevojiteshin per viza greke. Avdi Majtare, 54 vjec, banues ne Tirane, eshte arrestuar diten e djeshme nga policia e kryeqytetit, pasi dyshohet se pajiste me dokumente false persona te ndryshem, te cilet aplikonin prane Ambasades Greke per marrjen e vizave apo per te kryer bashkim familjar. Prej disa vitesh, 54-vjecari Avdi Majtare tregtonte paketa cigaresh prane ambasades greke te Rruga e Kavajes, ne Tirane. Ne nje kuti kartoni ai vendoste disa paketa dhe levizte ne kembe prane personave qe prisnin ne radhe per te aplikuar per vize greke. Shitjen e paketave, Majtare e ka shfrytezuar per te hyre ne bisedime me personat te cilet qendronin me ore te tera prane ambasades. Dyshohet se ai gjente personat te cilet kishin mangesi ne dokumentacionin qe duhet te dorezonin prane ambasades, me qellim qe te pajiseshin me vize greke apo te merrnin bashkim familjar. Kundrejt nje shume parash, e cila dyshohet se shkonte nga 100 euro deri ne 2 mije euro, Majtare pajiste me dokumente te falsifikuara personat te ndryshem. “Disa kohe me pare, kur ende nuk ishin liberalizuar vizat, dyshohet se 54-vjecari pajiste me dokumente te ndryshme false personat te cilet aplikonin per viza ne ambasaden greke. Me heqjen e vizave, Majtare dyshohet se ka vijuar serish me plotesimin e dokumenteve false, kesaj here per lejet e qendrimit ne shtetin fqinj apo dokumente te tjera, te cilat duhen per te udhetuar jashte vendit”, thane per gazeten “Koha Jone” burimet policore, te cilet shtuan se Majtares nuk iu sekuestruan shuma parash te perfituara nga ky aktivitet dhe ende nuk eshte saktesuar shuma qe ai perfitonte kundrejt dokumenteve false. Policia kishte siguruar informacione se nje person shiste paketa cigaresh pa pulle fiskale prane ambasades greke dhe per kete u vu menjehere ne levizje per kapjen e tij. Gjate kontrollit ne banesen e 54-vjecarit, vec paketave pa pulle fiskale, u sekuestruan dhe nje sere dokumentesh false. Nga hetimet u zbulua se ai pajiste personat e ndryshem me dokumentet false per viza greke. “Policia dyshon se 54-vjecari luante rolin e sekserit dhe se ka persona te tjere te implikuar ne kete aktivitet te jashteligjshem, por gjate deklarimeve te tij ne polici, ai e ka mohuar nje fakt te tille. Policia po vazhdon hetimet per te zbardhur te tjere emra”, thane per gazeten burimet policore. Ne momentin e kapjes, 54 vjecarit iu gjeten gjashte steka paketa cigaresh pa pulle fiskale te markave te ndryshme dhe nje sasi dokumentesh te ndryshme ne emer te shtetasve, qe pergatiteshin te aplikonin per viza pune dhe bashkim familjar ne Ambasaden Greke, dokumente si formulare, vertetime te Poliklinikes nr. 2, ne gjuhen shqipe dhe greke, vertetime te disa komunave te rretheve Tepelene, Fier, Lushnje, Librazhd, etj.; vertetime te Zyres se Gjendjes Gjyqesore te shtetasve te ndryshem, certifikata personale dhe familjare dhe dokumente te tjera. Gjate kontrollit ne banesen e tij u gjeten edhe 1500 paketa cigaresh “DS”, pa pullen fiskale, te cilat u sekuestruan ne cilesine e proves materiale.